تھانہ آبپارہ پولیس کی بڑی کارروائی‘ پتنگ فروش ڈیلر گرفتار‘ بھاری مقدار میں پتنگیں‘ ڈوریں اور دیگر اشیاء برآمد

اتوار 1 مارچ 2020 23:00

اسلام آباد ۔ یکم مارچ (اُردو پوائنٹ اخبارتازہ ترین - اے پی پی۔ 01 مارچ2020ء) ایس پی سٹی اسلام آبادسرفراز احمد ورک کی ہدایت پر تھانہ آبپارہ پولیس نے بڑی کارروائی کرکے پتنگ فروش ڈیلر کوگرفتار کر کے بھاری مقدار میں پتنگیں ڈوریں اور دیگر اشیاء برآمد کرلیں اور مقدمہ درج کر لیا۔ پولیس ترجمان کے مطابق تھانہ آبپارہ پولیس نے پتنگ فروشوں کے خلاف ایک کاروائی کے دوران پتنگ فروش ڈیلر وصال الرحمن کو گرفتار کرکے بڑی تعداد میں پتنگیں اور ڈور برآمد کرلیں۔

(جاری ہے)

ملزم کے خلاف مقدمہ درج کرکے مزید کارروائی شروع کردی گئی ہے۔ ضلعی انتظامیہ کی طرف سے وفاقی دارالحکومت میں ہر قسم کی پتنگ بازی پر پابندی عائد کی گئی ہے۔ کارروائی ایس پی سٹی زون سرفراز احمد ورک کی ہدایت پر ایس ایچ او تھانہ آبپارہ ارشاد ابڑو معہ ٹیم نے کی۔ ڈی آئی جی آپریشنز وقار الدین سید نے تمام پولیس افسران کو سختی سے ہدایت کی ہے کہ وہ اپنے اپنے علاقوں میں پتنگ بازوں کے خلاف سخت ایکشن لیں ایسے افراد کے خلاف مقدمات درج کرکے چالان عدالت پیش کریں۔