سعودی عرب ،کرونا وائرس کے خطرے کے پیش نظرفٹبال سمیت تمام کھیلوں میں تماشائیوں کے داخلے پر پابندی عائد

ریاض(اردو پوائنٹ تازہ ترین اخبار۔8مارچ2020ء ) سعودی عرب میں فٹ بال سمیت تمام کھیلوں میں تماشائیوں کے داخلے پر پابندی عائد کردی گئی ہے۔سعودی پریس ایجنسی کے مطابق وزارت سپورٹس نے کہا ہے کہ دنیا کے بیشتر ممالک میں کورونا وائرس کے حوالے سے وزارت کو تشویش ہے۔ سعودی حکومت نے اس کی روک تھام کے لیے سخت احتیاطی تدابیر اختیار کر رکھی ہیں۔ وزارت نے کہا ہے کہ ان احتیاطی تدابیر کے پیش نظر اور لوگوں کی سلامتی کو ملحوظ رکھتے ہوئے تمام کھیلوں میں تماشائیوں کے داخلے پر پابندی لگائی جارہی ہے۔

وزارت کے مطابق فٹبال سمیت تمام کھیلوں میں تماشائیوں کے داخلے پر پابندی کا اطلاق آج سے ہوگا۔ وزارت نے بتایا ہے کہ فیصلہ تاہدایت ثانی نافذ العمل رہے گا تاہم وزارت وقفے وقفے سے اس پر نظر ثانی کرتی رہے گی۔

(جاری ہے)

وزارت سپورٹس نے کہا ہے کہ جن کھیلوں کی ٹکٹیں فروخت ہوچکی ہیں ان کی قیمت واپس کرنے کے لیے اقدامات کر رہے ہیں۔ وزارت نے بتایا ہے کہ کھیلوں میں تماشائیوں کی شرکت پر پابندی کورونا وائرس کے انسداد کے لیے کام کرنے والی مشترکہ کمیٹی کی سفارش پر لگائی گئی ہے۔

یاد رہے کہ سعودی عرب نے کورونا وائرس کے سلسلے میں احتیاطی تدابیر اختیار کرتے ہوئے متحدہ عرب امارات (یو اے ای)، کویت اور بحرین سے زمینی روابط محدود کردیے۔سعودی پریس ایجنسی نے وزارت داخلہ کے حکام کا حوالہ دیتے ہوئے کہا کہ ان 3 خلیجی پڑوسیوں سے صرف کمرشل ٹرکوں کو آنے کی اجازت ہوگی۔خیال رہے کہ چین سے پھیلنے والے نئے کورونا وائرس سے دنیا بھر میں اب تک ایک لاکھ 2 ہزار سے زائد افراد متاثر اور 3 ہزار 400 افراد ہلاک ہوچکے ہیں۔ جہاں اس بیماری سے دنیا میں خوف و ہراس پھیل رکھا ہے وہیں اب تک 57 ہزار افراد اس سے مکمل صحت یاب بھی ہوچکے ہیں۔