کورونا وائرس،جنرل ہسپتال میں آن لائن ہیلتھ سروسز کا آغاز

،سکائپ پر ’ایل جی ایچ کورونا ہیلپ لائن‘ متعارف

جمعرات 19 مارچ 2020 17:33

کورونا وائرس،جنرل ہسپتال میں آن لائن ہیلتھ سروسز کا آغاز

لاہور۔19 مارچ(اُردو پوائنٹ اخبارتازہ ترین - اے پی پی۔ 19 مارچ2020ء) پرنسپل پوسٹ گریجویٹ میڈیکل انسٹی ٹیوٹ پروفیسر ڈاکٹر سردار محمد الفرید ظفر نے بتایا کہ کورونا وائرس کی روک تھام اور شہریوں کے بچائوکے لئے لاہور جنرل ہسپتال کی طرف سے آن لائن ہیلتھ سروسز کا آغاز کرتے ہوئے ہیلپ لائن متعارف کرا دی گئی ہے اور اب شہری گھر بیٹھے سکائپ پر’’ایل جی ایچ کورونا ہیلپ لائن‘‘ پر رابطہ کر کے کورونا وائرس کے بارے میں ضروری احتیاطی تدابیر ، علامات اورعلاج سے متعلق ڈاکٹروں سے آن لائن ہیلتھ ایڈوائزری لے سکتے ہیں۔

انہوں نے کہا کہ اس ویڈیو لنک سروس فراہم کرنے کا مقصد شہریوں کی نقل و حمل کو محدود کرنا اور کوروناوائرس سے پھیلنے سے روکنا ہے اور اس ہیلتھ لائن کے ذریعے متاثرہ افراد اور مشتبہ مریض گھر بیٹھ کر علاج معالجے کی سہولیات حاصل کر سکیں گے اور ہسپتالوں پر ورک لوڈ بھی کم ہوگا ۔

(جاری ہے)

ایم ایس ڈاکٹر محمود صلاح الدین نے کہا کہ ایل جی ایچ میں میگا فون کے ذریعے بھی شہریوں کو معلومات فراہم کی جا رہی ہیں تاکہ جدید ٹیکنالوجی سے استفادہ کر کے لوگوں کی مدد کی جا سکے ۔

انہوں نے کہا کہ ان حالات میں ہمیں انٹر نیٹ ، سکائپ اور تمام جدید سہولتوں کو بروئے کار لانا ہے ،کورونا سے ڈرنا نہیں بلکہ اس کا مقابلہ کرنے کے سلوگن کو عملی جامہ پہناتے ہوئے ہر شہری کا فرض ہے کہ وہ وزیر اعظم عمران خان اور وزیر اعلیٰ پنجاب سردار عثمان بزدار کی کاوشوں میں حصے دار بنے اور اپنا مثبت کردار ادا کرنے کے لئے آگے آئے۔پرنسپل پی جی ایم آئی اور ایم ایس نے یقین دلایا کہ جنرل ہسپتال میں کرونا کے حوالے سے محکمہ صحت پنجاب کی دی گئی گائیڈ لائنز پر مکمل عمل ہو رہا ہے اور انشاء اللہ کسی بھی قسم کی صورتحال سے نمٹنے کے لئے تمام انتظامات مکمل ہیں۔

انہوں نے کہا کہ شہری ہسپتال میں قائم ہیلپ لائن فون نمبر 042-99268808-9 پر بھی رابطہ کر سکتے ہیں۔ ان کی رہنمائی کیلئے ڈاکٹرز ہمہ وقت دستیاب ہونگے۔