فیصل آباد میں ڈینگی کا پھیلاؤ روکنے اور حفاظتی وتدارکی اقدامات کے تحت تحصیل ایمرجنسی رسپانس کمیٹیوں کے اجلاس فوری طلب کرنے کی ہدایت کردی گئی،

فیصل آباد (اُردو پوائنٹ اخبارتازہ ترین - اے پی پی۔ 27 اپریل2020ء) فیصل آباد میں کورونا وائرس کے خدشات کو مدنظر رکھ کر موسم کی تبدیلی اور بارشوں کے باعث ڈینگی کا پھیلاؤ روکنے اور حفاظتی وتدارکی اقدامات کے تحت تحصیل ایمرجنسی رسپانس کمیٹیوں کے اجلاس فوری طلب کرنے کی ہدایت کردی گئی ہے جبکہ متعلقہ محکموں کے سٹاف کے پاس موجود اینڈرائڈ موبائل فونزکوبھی ہمہ وقت فنکشنل رکھنے کا حکم دیاگیا ہے تاکہ کسی بھی جگہ پر کسی بھی قسم کے جراثیم یا ڈینگی لاروا کی افزائش نسل کی صورت میں متعلقہ جگہ کی تصاویر کھینچ کر فوری متعلقہ حکام کو ارسال کی جاسکیں اور بروقت کاروائی کرتے ہوئے تدارکی اقدامات کو ممکن بنایاجاسکے ۔

ڈپٹی کمشنر فیصل آباد محمد علی نے اس ضمن میں متعلقہ حکام کو سخت ہدایت کی ہے کہ موجودہ سیزن میں ڈینگی کے انسداد کیلئے جامع مائیکرو پلان ترتیب دیکر بھرپور ذمہ دارانہ عملدرآمد کو یقینی بنایا جائے اور شہریوں میں ڈینگی سے بچاؤ کیلئے احساس اجاگر کرنے کے ساتھ سرویلنس سرگرمیوں کو موثراورنتیجہ خیز بنا کرڈینگی کی ممکنہ افزائش کا تدارک کریں۔

(جاری ہے)

انہوں نے یہ ہدایت ایک اجلاس کی صدارت کرتے ہوئے جاری کی جس میں انسداد ڈینگی کے سلسلے میں حفاظتی وانسدادی اقدامات کا جائزہ لیا گیا۔اس موقع پر ایڈیشنل ڈپٹی کمشنر جنرل فضل ربی چیمہ،سی ای او ہیلتھ ڈاکٹر مشتاق سپرا،ڈسٹرکٹ ہیلتھ آفیسر ڈاکٹر بلال احمد،ڈسٹرکٹ کوآرڈینیٹر برائے ڈینگی کنٹرول ڈاکٹراورنگزیب کے علاوہ دیگرمحکموں کے افسران اجلاس میں شریک تھے۔

ڈپٹی کمشنر نے کہا کہ ضلع بھر میں ڈینگی کے خلاف مہم پورے جذبے کے ساتھ جاری رکھی جائے اورمتعلقہ حکام اس سلسلہ میں روزانہ کا سرویلنس شیڈول بنا کر عملدرآمد کرائیں جبکہ محکمانہ کوشش کسی لمحہ بھی ماند نہیں پڑنی چاہیے تاکہ ڈینگی کا مسئلہ سر نہ اٹھاسکے۔انہوں نے کہاکہ انسداد ڈینگی کیلئے ٹیموں کی سرویلنس کے شیڈول سے متعلق مساجد میں اعلانات کرائیں تاکہ شہری تعاون کریں اور ڈینگی کے تمام تر ذرائع کا سدباب ہو۔

ڈپٹی کمشنر نے کہاکہ گزشتہ سیزن میں سامنے آنی والی خامیوں کو دور کرنے کیلئے مؤثرترین اقدامات کئے جائیں تاکہ موجودہ سیزن میں کسی بھی ممکنہ صورتحال سے بہترانداز میں نمٹاجاسکے۔انہوں نے متعلقہ محکموں کے سٹاف کے پاس موجود اینڈرائڈ موبائل فونزکو فنکشنل رکھنے کی ہدایت کرتے ہوئے کہا کہ عوامی آگاہی کیلئے تشہیر کے ہرممکن ذرائع بروئے کار لائے جائیں۔