دبئی ایکسپو کے مقام پر آگ بھڑک اٹھنے کا واقعہ، صورتحال پر بروقت قابو پا لیا گیا

پیر کی صبح کو پیش آئے واقعے میں کسی قسم کا جانی نقصان نہیں ہوا، آگ کچرے کے ڈھیر میں لگی تھی

محمد علی منگل 12 مئی 2020 00:12

دبئی (اردوپوائنٹ اخبارتازہ ترین۔11 مئی 2020ء) دبئی ایکسپو کے مقام پر آگ بھڑک اٹھنے کا واقعہ، صورتحال پر بروقت قابو پا لیا گیا، پیر کی صبح کو پیش آئے واقعے میں کسی قسم کا جانی نقصان نہیں ہوا، آگ کچرے کے ڈھیر میں لگی تھی۔ العربیہ نیوز کی جانب سے فراہم کردہ تفصیلات کے مطابق دبئی میں نمائش 2020ء کی جگہ پر سوموار کی صبح کو آگ بھڑک اٹھی تھی۔

(جاری ہے)

اس حوالے سے متحدہ عرب امارات کے حکام کا کہنا ہے کہ آتشزدگی کے اس واقعے میں کسی قسم کا کوئی جانی نقصان نہیں ہوا۔

العربیہ نیوز کے مطابق پیر کی صبح کو دبئی کے جنوب میں واقع عالمی نمائش کی جگہ سے بہت دور سے سیاہ دھویں کے بادل اٹھتے ہوئے نظر آرہے تھے۔ حکام کا کہنا ہے کہ ایکسپو 2020ء کی جگہ پر تعمیراتی کچرے کے ڈھیر میں آگ لگی تھی اور اس پرقابو پا لیا گیا۔ یہاں یہ واضح رہے کہ دبئی ایکسپو2020ء نمائش کرونا وائرس کی وبا کے پیش نظر یکم اکتوبر 2021ء تک ملتوی کی جا چکی ہے۔