میکسیکو میں مہلک کورونا وائرس سے ہلاکتوں کی تعداد 10 ہزار سے تجاوز کر گئی

کورونا سے اموات اور نئے کیسز میں مسلسل اضافے کے باوجود میکسیکو میں حکام نے یکم جون سے لاک ڈاؤن ختم کرنے اور متعدد صنعتوں کو دوبارہ کھولنے کی اجازت دے دی

Kamran Haider Ashar کامران حیدر اشعر منگل 2 جون 2020 07:25

میکسیکو سٹی (اُردو پوائنٹ اخبارتازہ ترین۔ 02 جون2020ء) میکسیکو میں مہلک کورونا وائرس سے ہلاکتوں کی تعداد 10 ہزار سے تجاوز کر گئی۔ کورونا سے اموات اور نئے کیسز میں مسلسل اضافے کے باوجود میکسیکو میں حکام نے یکم جون سے لاک ڈاؤن ختم کرنے اور متعدد صنعتوں کو دوبارہ کھولنے کی اجازت دے دی۔ تفصیلات کے مطابق میکسیکو میں مہلک کورونا وائرس سے اب تک 10 ہزار 167 افراد ہلاک ہو چکے ہیں۔

فرانسیسی خبر رساں ادارے کے مطابق میکسیکو میں کورونا وائرس سے متاثرہ افراد کی تعداد میں مسلسل اضافہ ہو رہا ہے۔ تازہ اعداد و شمار کے مطابق ملک میں کورونا وائرس کے مصدقہ متاثرین کی تعداد 93 ہزار 435 تک پہنچ گئی ہے۔ واضح رہے کہ میکسیکو میں لاک ڈاؤن کی پابندیاں یکم جون سے ختم ہو گئی ہیں اور متعدد صنعتوں کو دوبارہ کھولنے کی اجازت دے دی گئی ہے۔

(جاری ہے)

حکام کے مطابق جن صنعتوں کو کھولنے کی اجازت دی گئی ہے ان میں کاروں کے پرزے بنانے والے مینوفیکچرنگ پلانٹس اور موٹر سائیکل کی دکانیں شامل ہیں۔ ماہرین صحت نے اس فیصلے پر تنقید کرتے ہوئے کہا ہے کہ کورونا وائرس کی وبا میکسیکو میں ابھی بھی شدت سے پھیل رہی ہے۔ 10 ہزار سے زائد افراد کی ہلاکتوں کے ساتھ ساتھ میکسیکو میں کورونا کے باعث 10 لاکھ نوکریاں ختم ہوگئی ہیں اور خدشہ ہے کہ اس سال سے معیشت میں 9 فیصد تک مزید کمی آئے گی۔