عدلیہ کے وقار اور انصاف کا تقاضہ ہے داغدار جج کے داغدار فیصلوں کو بھی پھاڑ پھینکا جائے‘ مریم نواز

تین بار ملک کے وزیر اعظم رہنے والے مقبول ترین سیاستدان کی بے گناہی پر وقت کا فیصلہ آ گیا ہے مکمل انصاف کا تقاضہ ہے جس طرح جج کو برطرف کیا گیا اسی طرح بدعنوان فیصلوں کو بھی کالعدم قرار دیا جائے

جمعہ 3 جولائی 2020 18:36

عدلیہ کے وقار اور انصاف کا تقاضہ ہے داغدار جج کے داغدار فیصلوں کو بھی ..

لاہور(اُردو پوائنٹ اخبارتازہ ترین - این این آئی۔ 03 جولائی2020ء) پاکستان مسلم لیگ (ن) کی نائب صدر مریم نواز نے کہا ہے کہ مکمل انصاف کا تقاضہ ہے کہ جس طرح جج کو برطرف کیا گیا ہے اسی طرح اس کے بدعنوان فیصلوں کو بھی کالعدم قرار دیا جائے،تین بار ملک کے وزیر اعظم رہنے والے مقبول ترین سیاست دان کی بے گناہی پر وقت کا فیصلہ آ گیا ہے۔ٹوئٹر پر اپنے بیان میں مریم نواز نے کہا کہ آئین و قانون کے احترام کا درس دینا بہت آسان ہے ،یہ جانتے ہوئے کہ آپ بے قصور ہوں، جانتے ہوئے کہ ظلم اور ناانصافی ہو رہی ہے اپنی شریک حیات کو بستر مرگ پر چھوڑ کر قانون کے سامنے سر جھکا دینے کے لئے نواز شریف کا جگر اورحوصلہ چاہیے،اللہ بے گناہ اور بہادر لوگوں کو تنہا نہیں چھوڑتا،انصاف کبھی ادھورا نہیں ہوتا۔

انہوں نے کہاکہ مکمل انصاف کا تقاضہ ہے کہ جس طرح جج کو برطرف کیا گیا ہے اسی طرح اس کے بدعنوان فیصلوں کو بھی کالعدم قرار دیا جائے،تین بار ملک کے وزیر اعظم رہنے والے مقبول ترین سیاست دان کی بے گناہی پر وقت کا فیصلہ آ گیا ہے۔

(جاری ہے)

انہوںنے کہا کہ سات محترم ججزصاحبان نے جج کی برطرفی کے ذریعے واضح کر دیا ہے کہ نوازشریف کو کس طرح سزائیں دی گئیں،یہ فیصلہ بے شک سچ کی فتح اور جھوٹ کی شکست ہے،ا س فیصلے نے نواز شریف پر ہی نہیں ،عدل و انصاف کے دامن پر لگا ایک بڑا داغ دھویا ہے،اللہ کا بے انتہا شکر جس کے ہاں نا دیر ہے نا اندھیر،اب عدلیہ کے وقار اور انصاف کا تقاضہ ہے کہ داغدار جج کے داغدار فیصلوں کو بھی پھاڑ پھینکا جائے۔