حکومت نے بہترین حکمت عملی سے سی پیک کے سب سے اہم منصوبے ایم ایل 1 کے اخراجات میں اربوں ڈالرز کی کمی کرلی

اسلام آباد (اردو پوائنٹ اخبار تازہ ترین۔ 05 اگست2020ء) : حکومت نے بہترین حکمت عملی سے سی پیک کے سب سے اہم منصوبے ایم ایل 1 کے اخراجات میں اربوں ڈالرز کی کمی کرلی، منصوبے کے باقاعدہ آغاز اور بجٹ کی منظوری دے دی گئی، 9ارب ڈالر میں مکمل ہونے والے منصوبے کی لاگت 6ارب 80کروڑ ڈالر رکھی گئی ہے، تفصیلات کے مطابق قومی اقتصادی کونسل کی ایگزیکٹو کمیٹی نے6 ارب 80 کروڑ ڈالر مالیت کے ایم ایل ون منصوبے کی منظوری دیدی ہے۔

مشیر خزانہ حفیظ شیخ کی زیر صدارت قومی اقتصادی کونسل کی ایگزیکٹو کمیٹی (ایکنک) کا اجلاس ہوا، اجلاس میں پاکستان ریلوے کے ایم ایل ون منصوبے کی منظوری دے دی گئی، منصوبے پر 6 ارب 80 کروڑ ڈالر لاگت آئے گی۔اس حوالے سے حفیظ شیخ کا کہنا تھا کہ ایم ایل ون منصوبہ سی پیک کا حصہ ہے جس کا افتتاح اسی سال کیا جائے گا، اور یہ منصوبہ پانچ سال میں مکمل ہوگا، منصوبے کے تحت 1872 کلو میٹر کراچی تا پشاور ریلوے ٹریک کی اپگریڈیشن کی جائے گی۔

(جاری ہے)

چیئرمین سی پیک اتھارٹی عاصم باجوہ نے سماجی رابطے کی ویب سائٹ ٹویٹر پر اپنی ٹویٹ میں تصدیق کرتے ہوئے کہا کہ ایکنک نے ریلوے کا منصوبہ ایم ایل ون منظور کر لیا، پشاور سے کراچی ایم ایل ون منصوبے پر 6.8 ارب ڈالر کی لاگت آئے گی، جب کہ منصوبے کے تحت حویلیاں ڈرائی پورٹ اور والٹن اکیڈمی کی اپ گریڈیشن بھی ہوگی۔وزیر ریلوے شیخ رشید احمد نے کہا ہے کہ کراچی سے پشاور تک 1872 کلومیٹر طویل ریلوے ٹریک ایم ایل ون منصوبے سے منصوبے سے ڈیڑھ لاکھ لوگوں کو نوکریاں ملیں گی۔ سماجی رابطے کی ویب سائٹ ٹوئٹر پر اپنے پیغام میں شیخ رشید نے کہا کہ آج پاکستان کی تاریخ کےسب سے بڑے منصوبے کی منظوری دی گئی ہے۔