ادویات کا معیار جانچنے کے لیے ملک کی پہلی نجی ٹیسٹنگ لیبارٹری اسلام آباد میں قائم

لیبارٹری عالمی ادارہ صحت سے منظور شدہ ہے، دیگرممالک کو بھی ادویات کا معیار چیک کرانے کی سہولت فراہم کی جارہی ہے، سی ای او ڈاکٹر امبرین

بدھ 12 اگست 2020 14:15

اسلام آباد (اُردو پوائنٹ اخبارتازہ ترین - اے پی پی۔ 12 اگست2020ء) ادویات کا معیار جانچنے کے لیے ملک کی پہلی نجی ٹیسٹنگ لیبارٹری اسلام آباد میں قائم کر دی گئی۔سی او او ڈرگ لیب ڈاکٹر امبرین نے کہا کہ دواکے اصل یا جعلی اور اس کا معیار کو سرکاری سطح پر جانچنے کے لئے اسلام آباد میں عالمی معیار کی پہلی نجی لیبارٹری قائم کی گئی ہے جہاں ادویات کے معیار کی جانچ مکمل غیر جانبدارانہ ہوگی۔

اس لیب کو عالمی اداروں کا بھروسہ اور اعتماد بھی حاصل ہے اور یہ عالمی ادارہ صحت سے منظور شدہ ہے۔

(جاری ہے)

ہماری کوشش ہے کہ ہم پاکستان میں ٹیسٹنگ کرسکیں تاکہ کوالٹی ڈرگز میسر ہوں۔ پاکستان کی پہلی نجی ڈرگ ٹیسٹنگ لیب میں آلات جرمنی اور جاپان سے درآمد کیے گئے ہیں اور ادویات اور ان کے اجزاء کی جانچ برطانوی اور امریکی ڈرگ اتھارٹیز کے قواعد و ضوابط کے تحت کی جا رہی ہے۔

یہاں صرف پاکستان ہی نہیں بلکہ دنیا کے مختلف ممالک کو بھی اپنی ادویات کا معیار چیک کرانے کی سہولت فراہم کی جارہی ہے۔ پاکستان کی پہلی نجی ڈرگ ٹیسٹنگ لیب کے قیام سے ملکی ڈرگ ایکسپورٹرز اور امپورٹرز کو بھی فائدہ ہوگا جنہیں ادویات بیرون ملک بھجوانے یا منگوانے سے پہلے دیگر ممالک کی ڈرگ لیبارٹریز سے ان کے معیاری ہونے کا سرٹیفکیٹ لینا پڑتا تھا۔