نیوزی لینڈ ویمن نے آسٹریلیا ویمن کو تیسرے اور آخری ٹی ٹونٹی انٹرنیشنل کرکٹ میچ میں 5 وکٹوں سے ہرا دیا،

تین میچوں کی سیریز 2-1 سے آسٹریلیا کے نام، ایمیلیا کر میچ کی بہترین کھلاڑی قرار پائیں

بدھ 30 ستمبر 2020 12:48

نیوزی لینڈ ویمن نے آسٹریلیا ویمن کو تیسرے اور آخری ٹی ٹونٹی انٹرنیشنل ..

برسبین (اُردو پوائنٹ اخبارتازہ ترین - اے پی پی۔ 30 ستمبر2020ء) نیوزی لینڈ ویمن نے سخت مقابلے کے بعد آسٹریلیا ویمن ٹیم کوتیسرے اور آخری ٹی ٹونٹی انٹرنیشنل کرکٹ میچ میں 5 وکٹوں سے ہرا دیا، تین میچوں کی سیریز 2-1 سے آسٹریلیا کے نام رہی۔ فاتح ٹیم نے 124 رنز کا ہدف 19ویں اوور کی تیسری گیند پر 5 وکٹوں کے نقصان پر حاصل کیا، ایمیلیا کر نے آل رائونڈ کارکردگی کا مظاہرہ کرتے ہوئے اپنی ٹیم کی فتح میں اہم کردار ادا کیا اور میچ کی بہترین کھلاڑی قرار پائیں۔

آسٹریلیا کی ایشلے گارڈنر سیریز کی بہترین کھلاڑی قرار پائیں۔ ایلن بارڈر فیلڈ، برسبین میں کھیلے گئے تین میچوں کی سیریز کے تیسرے اور آخری ٹی ٹونٹی میچ میں نیوزی لینڈ ویمن ٹیم کی کپتان صوفی ڈیوائن نے ٹاس جیت کر پہلے فیلڈنگ کا فیصلہ کیا۔

(جاری ہے)

آسٹریلوی ویمن ٹیم پہلے بیٹنگ کرتے ہوئے مقررہ اوورز میں 7 وکٹوں کے نقصان پر 123 رنز بنا کر آئوٹ ہوگئی اور اس نے مہمان ٹیم کو میچ میں کامیابی کے لئے 124 رنز کا ہدف دیا۔

میزبان ویمن ٹیم کی طرف سے ایشلے گارڈنر 29 کپتان میگ لیننگ 21 اور صوفی مولینیکس 18 رنز بناکر آئوٹ ہوئیں۔ نیوزی لینڈ کی لیا طاہو اور ایمیلیا کر نے دو، دو جبکہ صوفی ڈیوائن، ہیلی جینسن اور میڈی گرین نے ایک ایک کھلاڑی کو آئوٹ کیا۔ جواب میں نیوزی لینڈ ویمن ٹیم نے سخت مقابلے کے بعد مطلوبہ ہدف 19.3 اوورز میں 5 وکٹ کے نقصان پر پورا کیا، ایمی سٹرتھویٹ 30، کپتان صوفی ڈیوائن 25، وکٹ کیپر بلے باز کیٹی مارٹن نے 23 جبکہ ایمیلیا کر نے ناقابل شکست 18 رنز بناکر ٹیم کی فتح میں اہم کردار ادا کیا۔

جارجیا وارہم نے 2 جبکہ جیس جانسن اور ڈیلیسا نے ایک ایک کھلاڑی کو آئوٹ کیا۔ یوں نیوزی لینڈ ویمن ٹیم نے آسٹریلیا ویمن ٹیم کو تیسرے اور آخری ٹی ٹونٹی انٹرنیشنل کرکٹ میچ میں 5 وکٹوں سے شکست دے بالآخر تین ٹی ٹونٹی انٹرنیشنل میچوں کی سیریز کے ایک میچ میں فتح کا مزہ چکھ ہی لیا۔ تین ٹی ٹونٹی انٹرنیشنل میچوں کی سیریز 2-1 سے آسٹریلیا ویمن ٹیم کے نام رہی۔ نیوزی لینڈ کی ایمیلیا کر میچ اور آسٹریلیا کی ایشلے گارڈنر سیریز کی بہترین کھلاڑی قرار پائیں۔