امریکا میں 32 سال بعد اولمپکس کا انعقاد، صدر ٹرمپ نے تیاری کیلئے ٹاسک فورس قائم کر دی

ٹاسک فورس گیمز کی تیاری، سکیورٹی اورانتظامات کی نگرانی کریگی، اولمپکس میں مردوں کو خواتین کی ٹرافیاں چرانے کی اجازت نہیں دی جائے گی، امریکی صدر

ذیشان مہتاب بدھ 6 اگست 2025 12:03

امریکا میں 32 سال بعد اولمپکس کا انعقاد، صدر ٹرمپ نے تیاری کیلئے ٹاسک ..

واشنگٹن (اردو پوائنٹ تازہ ترین اخبار ۔ 6 اگست 2025ء) سالٹ لیک سٹی ونٹر اولمپکس 2002ء کے بعد امریکا میں پہلی بار سال 2028ء میں اولمپکس منعقد ہوں گے، صدر ڈونلڈ ٹرمپ نے ٹاسک فورس کے قیام کیلئے ایگزیکٹو آرڈر پر دستخط کردیئے۔

تفصیلات کے مطابق لاس اینجلس اولمپکس کیلئے خصوصی حکومتی اقدامات کا آغاز کردیا گیا ہے، صدر ٹرمپ نے امریکا میں 2028ء اولمپکس کیلئے ٹاسک فورس قائم کردی ہے۔

وائٹ ہاؤس ترجمان کا کہنا ہے کہ ٹاسک فورس گیمز کی تیاری، سیکیورٹی اورانتظامات کی نگرانی کرے گی، 3 سال بعد ہونے والے اولمپکس کیلئے منصوبہ بندی شروع کردی گئی ہے، یہ صدرٹرمپ کی دوسری مدت صدارت کا اہم ایونٹ ہے۔

اس حوالے سے امریکی صدرٹرمپ نے لاس اینجلس اولمپکس سے متعلق تقریب سے خطاب کیا۔

(جاری ہے)

صدرڈونلڈ ٹرمپ نے امریکا میں 2028ء میں ہونے والے اولمپکس کیلئے ٹاسک فورس کے قیام کیلئے ایگزیکٹو آرڈر پردستخط کردیے۔

انہوں نے کہا کہ 2028ء اولمپکس امریکا کی تاریخ کا اہم موڑ ہوگا، لاس اینجلس گیمز کا شدت سے انتظار ہے، اگلے سال فیفا ورلڈ کپ ہے اور اس کے بعد اولمپکس ہوں گے، ہرمیدان کی طرح اولمپکس میں بھی امریکا کی حکمرانی قائم ہے، امریکی کھلاڑیوں سے زیادہ آج تک کسی نے گولڈ میڈل نہیں جیتے۔

واضح رہے کہ اس سے قبل امریکا نے 1904ء میں سینٹ لوئس، 1932ء اور 1984ء میں لاس اینجلس اور 1996ء میں اٹلانٹا میں اولمپک کھیلوں کی میزبانی کی تھی۔

تاہم 2028ء کے اولمپکس کے علاوہ امریکا میں 2026ء کے سرمائی اولمپک کھیلوں کے لیے بھی بولی لگائی گئی تھی لیکن یہ میزبانی اٹلی کو دے دی گئی۔ لہٰذا اب سال 2028ء کے اولمپکس لاس اینجلس میں منعقد ہوں گے۔