بدبخت بیٹے نے نشے کیلئے پیسے نہ ملنے پر اپنے والد اور والدہ کو بیدردی سے قتل کر دیا

حافظ آباد میں ملزم زبیر نے والدین پر ہتھوڑوں کے وار کیے، ملزم دونوں لاشیں گھر میں بند کر کے فرار ہو گیا

بدھ 21 اکتوبر 2020 22:33

حافظ آباد (اُردو پوائنٹ اخبارتازہ ترین۔ 21 اکتوبر2020ء) بدبخت بیٹے نے نشے کیلئے پیسے نہ ملنے پر اپنے والد اور والدہ کو بیدردی سے قتل کر دیا ، حافظ آباد میں ملزم زبیر نے والدین پر ہتھوڑوں کے وار کیے، ملزم دونوں لاشیں گھر میں بند کر کے فرار ہو گیا۔ تفصیلات کے مطابق حافظ آباد کے علاقہ پھول ٹاؤن میں دوہرے قتل کی لرزہ خیز واردات، بدبخت بیٹے نے نشے کیلئے پیسے نہ ملنے پر بیدردی سے اپنے والد عمر حیات اور والدہ آسیہ بی بی کو قتل کر ڈالا۔

بتایا گیا ہے کہ نشے کے عادی ملزم زبیر نے والدین کوہتھوڑوں کے وار کر کے بیدردی سے قتل کیا- واردات کے بعد ملزم دونوں لاشیں گھر میں بند کر کے فرار ہو گیا- ملزم کا چھوٹا بھائی جب گھر پہنچا تووالدین کی لاشیں دیکھ کر ہوش کھو بیٹھا، حالت غیر ہونے پر اسے ریسکیو اہلکاروں نے ہسپتال منتقل کر دیا۔

(جاری ہے)

مقتولین کی بیٹی اور دیگر رشتہ داروں کا کہنا تھا کہ ملزم زبیر نشے کا عادی تھا نشے کیلئے پیسے نہ ملنے پر اس نے اپنے والد اور والدہ کا قتل کیا۔

پولیس نے موقع پر پہنچ کر دونوں لاشیں تحویل میں لیکر ہسپتال منتقل کر دیں جبکہ پولیس فرانزک ٹیم نے موقع سے شواہد بھی اکٹھے کر لئے - اہل محلہ کے مطابق ملزم نشے کا عادی اور پہلے بھی گھر والوں سے لڑائی جھگڑا کرتا تھا۔ بوڑھی ماں اور باپ دونوں کو قتل کرنے کے الزام میں پولیس تھانہ سٹی نے بیٹے زبیر کے خلاف دوہرے قتل کے الزام میں اس کے بھائی شعیب حیات کی مدعیت میں مقدمہ درج کرلیا۔ پولیس نے ملزم کی گرفتاری کے لئے چھاپے مارنا شروع کردیئے۔ پولیس کا کہنا ہے کہ ملزم کی تلاش جاری ہے، اسے جلد گرفتار کرلیا جائے گا۔