Live Updates

ٹرمپ کی ٹیم کا ایران کی بندرگاہوں پرناکہ بندی کو مزید وسعت دینے کا فیصلہ

ایرانی بندرگاہ کی ناکہ بندی کے ساتھ آبنائے ہرمز کی طویل مدتی بندش بھی شامل ہوگی، امریکا نے ایران کے ساتھ معاہدے کیلئے مطالبات میں جوہری معاملہ دوبارہ شامل کرلیا ہے۔ سی این این

ثنااللہ ناگرہ جمعہ 1 مئی 2026 20:27

ٹرمپ کی ٹیم کا ایران کی بندرگاہوں پرناکہ بندی کو مزید وسعت دینے کا فیصلہ

واشنگٹن (اردوپوائنٹ اخبار تازہ ترین۔ انٹرنیشنل پریس ایجنسی ۔ 01 مئی 2026ء ) امریکی صدرڈونلڈ ٹرمپ کی ٹیم نے ایران کی بندرگاہوں پرناکہ بندی کو مزید وسعت دینے کا فیصلہ کرلیا ہے۔ سی این این کے مطابق ایرانی بندرگاہ کی ناکہ بندی کے ساتھ آبنائے ہرمز کی طویل مدتی بندش بھی شامل ہوگی، امریکا نے ایران کو معاہدے کیلئے دیئے گئے مطالبات میں جوہری معاملہ دوبارہ شامل کرلیا ہے۔

ایگزیوس رپورٹ کے مطابق صدر ٹرمپ کے مشیر اسٹیووٹکوف نے معاہدے میں ترامیم ایران کو بھجوا دی ہیں۔ ایران کو مذاکرات کے دوران افزودہ یورینیم منتقل نہ کرنے کا وعدہ کرنا ہوگا۔ ایران یقین دہانی کرائے کہ جوہری تنصیبات پر کوئی سرگرمی شروع نہیں کرے گا۔ دوسری جانب ایرانی وزیرخارجہ عباس عراقچی نے خطے میں اہم ممالک کے وزرائے خارجہ سے رابطے کئے ہیں۔

(جاری ہے)

ایرانی وزیرخارجہ نے ترکیہ، مصر، قطر، سعودی عرب ، عراق اور آذربائیجان کے وزرائے خارجہ سے رابطے کیئے ہیں۔ عباس عراقچی نے مذاکرات اور جنگ بندی سے متعلق ایران کے مئوقف پر تبادلہ خیال کیا۔ ایران نے امریکا اوراسرائیل سے متعلق اپنی پالیسی اور اصولی مئوقف سے آگاہ کیا۔ ایرانی وزیرخارجہ نے کہا کہ خطے میں کشیدگی کے خاتمے کیلئے ایران کی کوششیں جاری ہیں، امریکا اپنے جنگی اخراجات اور نقصانات سے متعلق جھوٹ بول رہا ہے۔

پینٹا گون ایران جنگ میں اپنے نقصانات اور اخراجات چھپا رہا ہے، نیتن یاہو کی پالیسی نے امریکا کو بھاری معاشی نقصان پہنچایا۔ امریکا کو اب تک 100ارب ڈالر کا نقصان ہوچکا ہے۔ امریکا کے اصل اخراجات 100ارب ڈالر سے بھی زیادہ ہوسکتے ہیں۔ امریکی شہری ہر ماہ تقریباً 500ڈالر کا اضافہ بوجھ برداشت کررہے ہیں۔ ایرانی سرکاری میڈیا کے مطابق ایران نے مذاکرات کیلئے تجاویز پاکستانی ثالثوں کے ذریعے امریکا کو بھیج دیں۔ ایران کی جانب سے تجاویز جمعرات کی شام کو بھیجی گئیں۔