پولیس کی کراچی شہر کے مختلف علاقوں میں کارروائیاں، 20 ملزمان کو گرفتار

کراچی(اُردو پوائنٹ اخبارتازہ ترین - آن لائن۔ 15 دسمبر2020ء) پولیس نے شہر کے مختلف علاقوں میں کارروائیاں کرتے ہوئے اسٹریٹ کرمنلز۔ڈکیت۔منشیات اور گٹکا فروشوں سمیت 20 ملزمان کو گرفتار کرکے اسلحہ۔منشیات۔گٹکا ودیگر مسروقہ سامان برآمد کرلیا۔تفصیلات کے مطابق سول لائن پولیس نے جرائم پیشہ افراد کے خلاف کارروائی کے دوران ملزم محمد طیب کو گرفتار کرکے چوری شدہ موٹر سائیکل برآمد کرلی۔

ملیر سٹی پولیس نے منشیات فروش خان محمد عرف خانو کو گرفتار کرکے ڈیڑھ کلو سے زائد اعلی کوالٹی کی چرس برآمد کرلی۔پولیس کے مطابق گرفتار ملزم کی بیوی شیما عرف شمع موقع سے فرار ہوگئی جس کی تلاش جاری ہے۔نیو ٹائون پولیس نے گٹکا فروش توصیف کو گرفتار کرکے مضر صحت گٹکا برآمد کرلیا۔

(جاری ہے)

چاکیواڑہ پولیس نے دو اسٹریٹ کرمنلز احمد علی اور شہزاد احمد کو گرفتار کرکے اسلحہ اور مسروقہ موبائل فونز برآمد کرلئے۔

سائٹ سپر ہائی وے پولیس نے خفیہ اطلاع پر کارروائی کرتے ہوئے منشیات کی سپلائی میں ملوث ملزم محمد شفیع کو گرفتار کرکے 30 کلو 900 گرام چرس 43000 ہزار روپے نقد اور موبائل فون برآمد کرلیا۔ پولیس کے مطابق گرفتار ملزم رکشہ ڈرائیور ہے جو کہ منشیات رکشے میں رکھ کر مختلف علاقوں میں سپلائی کرتا ہے۔مبینہ ٹائون پولیس نے اسٹریٹ کرائم کی وارداتوں میں ملوث دو ملزمان اشفاق اور عامر علی کو گرفتار کرکے اسلحہ اور مسروقہ موبائل فونز برآمد کرلئے۔

پی آئی بی کالونی پولیس نے دو ملزمان نور محمد اور محمد شاہد کو گرفتار کرلیا۔پولیس کے مطابق گرفتار ملزمان کی جانب سے جمعہ وہفتہ کی درمیانی شب شادی کی خوشی میں کی جانے والی ہوائی فائرنگ کے نتیجے میں گولی لگنے سے مصطفی نامی نوجوان زخمی ہوا تھا جو دوران علاج جاں بحق ہوگیا۔پولیس کے مطابق شادی کی تقریب میں ہوائی فائرنگ کی ویڈیو سوشل میڈیا پر وائرل ہوئی تھی۔

تاہم پولیس نے واقعہ کا مقدمہ درج کرلیا۔عیدگاہ پولیس نے گٹکا فروش فقیر محمد کو گرفتار کرکے مضر صحت گٹکا برآمد کرلیا۔چاکیواڑہ پولیس نے 8 سالہ بچے سے بدفعلی میں ملوث ملزم شاہ زیب عرف باٹوا کو گرفتار کرلیا۔رضویہ پولیس نے موٹر سائیکل لفٹنگ گروہ کا کارندہ ایاز کو گرفتار کرکے سرقہ شدہ موٹر سائیکل برآمد کرلی۔اسی تھانے کی پولیس نے ایک اور کارروائی میں گٹکا فروش فاروق کو گرفتار کرکے گٹکا برآمد کرلیا۔

ڈاکس پولیس نے منشیات فروش شفیق اور محمد مقصود کو گرفتار کرکے 580 گرام چرس برآمد کرلی۔ایک اور کارروائی میں ڈاکس پولیس نے گٹکا فروش علی اکبر کو گرفتار کرکے گٹکا برآمد کرلیا۔اسی تھانے کی پولیس نے تیسری کارروائی کے دوران اسٹریٹ کرمنلز سہیل اور قربان کو گرفتار کرکے قبضے سے مسروقہ سامان برآمد کرلیا