Live Updates

پنجاب میں سیلاب سے 101 اموات، 4 ہزار700 دیہات اور 45 لاکھ 70 ہزار افراد متاثر

لاکھ 12ہزار افراد اور 20لاکھ 19ہزار جانور محفوظ مقامات پر منتقل، شہریوں کے نقصانات کا ازالہ کیا جائیگا‘ ریلیف کمشنر پنجاب

ہفتہ 13 ستمبر 2025 14:25

پنجاب میں سیلاب سے 101 اموات، 4 ہزار700 دیہات اور 45 لاکھ 70 ہزار افراد متاثر

لاہور (اُردو پوائنٹ اخبارتازہ ترین - این این آئی۔ 13 ستمبر2025ء) پنجاب میں دریائے راوی، ستلج اور چناب میں شدید سیلاب کے باعث اب تک 101شہری جاں بحق ہوچکے، 4ہزار 700سے زائد موضع جات اور 45لاکھ 70ہزار افراد متاثر ہوئے، سیلاب میں پھنسنے والے 25لاکھ 12ہزار افراد کو محفوظ مقامات پر منتقل کیا گیا۔پنجاب ڈیزاسٹر مینجمنٹ اتھارٹی (پی ڈی ایم ای)نے دریائے راوی، ستلج اور چناب میں سیلاب کے باعث ہونے والے نقصانات کی رپورٹ جاری کردی۔

پی ڈی ایم اے نے دریائے راوی، ستلج اور چناب میں سیلاب کے باعث ہونے والے نقصانات کی تازہ رپورٹ جاری کر دی ہے۔ریلیف کمشنر نبیل جاوید کے مطابق دریائے راوی، ستلج اور چناب میں سیلاب کے باعث 4ہزار 700سے زائد موضع جات متاثر ہوئے، دریائے چناب میں سیلاب کے باعث مجموعی طور پر 2ہزار 489موضع جات متاثر ہوئے۔

(جاری ہے)

انہوں نے کہا کہ دریائے ستلج میں سیلاب کے باعث 701موضع جات متاثر ہوئے، دریائے راوی میں سیلاب کے باعث 1458موضع جات متاثر ہوئے، سیلابی صورتحال کے باعث مجموعی طور پر 45لاکھ 70ہزار لوگ متاثر ہوئے۔

ریلیف کمشنر نے بتایا کہ شدید سیلاب سے متاثرہ اضلاع میں 392ریلیف کیمپس قائم کیے گئے ہیں، 493 میڈیکل کیمپس بھی قائم کیے گئے ہیں، مویشیوں کو علاج معالجے کی سہولت فراہم کرنے کے لیے 422 ویٹرنری کیمپس قائم کیے گئے ہیں۔انہوں نے کہا کہ متاثرہ اضلاع میں ریسکیو وہ ریلیف سرگرمیوں میں 20لاکھ 19ہزار جانوروں کو محفوظ مقامات پر منتقل کیا گیا ہے۔ریلیف کمشنر کا کہنا تھا کہ دریائے ستلج پر موجود بھارتی بھاکڑا ڈیم 88فیصد تک بھر چکا ہے، پونگ ڈیم 94فیصد جبکہ تھین ڈیم 89 فیصد تک بھر چکا ہے۔

نبیل جاوید نے بتایا کہ منگلا ڈیم 93فیصد جبکہ تربیلا ڈیم 100فیصد تک بھر چکا ہے، حالیہ سیلاب میں مختلف حادثات میں 101 شہری جاں بحق ہوچکے ہیں۔انہوں نے کہا کہ وزیر اعلی پنجاب کی ہدایات کے پیش نظر شہریوں کے نقصانات کا ازالہ کیا جائے گا۔