45 دن کا سفر صرف 13 دن میں طے ہوگا

پاکستان سمیت 4 ممالک کو بذریعہ ریل جوڑنے کے منصوبے میں بڑی پیش رفت

muhammad ali محمد علی اتوار جنوری 00:03

45 دن کا سفر صرف 13 دن میں طے ہوگا
اسلام آباد (اردوپوائنٹ اخبار تازہ ترین۔ 16جنوری 2021ء) 45 دن کا سفر صرف 13 دن میں طے ہوگا، پاکستان سمیت 4 ممالک کو بذریعہ ریل جوڑنے کے منصوبے میں بڑی پیش رفت۔ تفصیلات کے مطابق پاکستان کو خطے کے ممالک کے ذریعے بذریعہ ریلوے لائن جوڑنے اور تجارتی سرگرمیوں میں اضافے کے منصوبے کے سلسلے میں بڑی پیش رفت ہونے کی اطلاعات ہیں۔ بتایا گیا ہے کہ ابتدائی طور پر پاکستان، ایران اور ترکی کے درمیان ریلوے ٹریک کے ذریعے کارگو ٹرین کی آمد و رفت شروع کرنے کے منصوبے میں اب چین کو بھی شامل کر لیا گیا ہے۔

ذرائع کے مطابق ترکی سے پاکستان براستہ ایران کارگو ٹرین چین تک لے جانے کا منصوبہ پر سنجیدگی سے غور کیا جا رہا ہے۔ اس منصوبے کو آپریشنل کرنے کیلئے بھاری سرمایہ کاری درکار جو چین فراہم کرنے کیلئے تیار ہے۔

(جاری ہے)

پاکستانی، ترکی اور ایرانی حکومتوں نے کچھ روز قبل ہی سرد خانے میں پڑے ریل لنک پراجیکٹ کو برسوں بعد بحال کرنے پر اتفاق کیا تھا۔ بتایا گیا ہے کہ تینوں ممالک اس مرتبہ سنجیدگی سے ان ریل لنک کو آپریشنل کرنے کیلئے کوششیں کر رہے ہیں۔

اسلام آباد، تہران اور استنبول ریلوے ٹریک کی بحالی کی تمام بنیادی ضرورتیں پوری کر لی گئی ہیں۔ اس ٹریک پر ٹرین سروس رواں سال شروع ہو جائے گی۔ ابتدائی طور پر ٹریک پر کارگو ٹرین سروس شروع کی جائے گی، جس کا نام ای سی او کنٹینر ٹرین رکھا گیا ہے۔ تینوں ممالک کے درمیان ریل ٹریک کے بحال ہونے سے ابتدائی طور پر تجارت اور پھر بعد ازاں سیاحت کے شعبہ کو بھی فروغ ملے گا۔

تجارت میں فروغ کے ساتھ ساتھ تینوں ملکوں کے سیاحوں کی آمدورفت بھی توقع سے بڑھ سکتی ہے۔ اس کے علاوہ یہ نقل و حمل کا رابطہ تینوں ملکوں میں تعلقات کو بہتر خطوط پر استوار کرنے میں بھی کلیدی کردار کا حامل ہو سکے گا۔ ترک وزیر ٹرانسپورٹ عادل کارا اسماعیل اولو کا کہنا ہے کہ پاکستان، ایران اور ترکی نے ایکسپورٹ کارگو ٹرین سروس جلد شروع کرنے پر آمادگی ظاہر کر دی ہے۔

نئی کارگو ٹرین سروس کو ای سی او کنٹینر ٹرین کا نام دیا گیا ہے۔ یہ ٹرین سروس رواں سال شروع ہو جائے گی۔ اسلام آباد سے چلنے والی کارگو ٹرین 6500 کلومیٹر کا فاصلہ 13 دن میں طے کر کے استنبول پہنچ جائے گی۔ یہی فاصلہ سمندر کے ذریعے 45 روز میں طے کیا جاتا ہے۔ اسلام آباد سے چلنے والی کارگو ٹرین پاکستان میں 1900 کلو میٹر، ایران میں 2600 کلو میٹر اور ترکی میں 1950 کلو میٹر کا فاصلہ طے کرے گی۔ اس منصوبے کو جہاں ایران اور ترکی کیلئے اہم قرار دیا جا رہا ہے، وہیں پاکستان کیلئے بھی یہ منصوبہ ایک گیم چینجر کی حیثیت رکھتا ہے۔