کوئی بچہ بھوکا نہ سوئے ،ہر خاندان کو محفوظ، غذائیت سے بھرپور اور سستی خوراک دستیاب ہو، صدر آصف علی زرداری کا خوراک کے عالمی دن کے موقع پر پیغام

اسلام آباد (اُردو پوائنٹ اخبارتازہ ترین - اے پی پی۔ 15 اکتوبر2025ء) صدر مملکت آصف علی زرداری نے کہا ہے کہ حکومت پاکستان، وزارت قومی تحفظ خوراک و تحقیق کے ذریعے صوبائی حکومتوں، بین الاقوامی تنظیموں اور نجی شعبے کے ساتھ مل کر موسمیاتی تبدیلیوں سے ہم آہنگ زراعت، بہتر آبی و زمینی انتظام، مضبوط خوراک کی ترسیلی زنجیروں اور کمزور طبقات کے لیے سماجی تحفظ جیسے اقدامات پر بھرپور کام کر رہی ہے۔

ایوان صدر کے پریس ونگ کے مطابق صدر مملکت نے ان خیالات کا اظہار خوراک کے عالمی دن کے موقع پر اپنے پیغام میں کیا۔ انہوں نے کہا کہ 1979ء سے دنیا ہر سال 16 اکتوبر کو عالمی یوم خوراک کے طور پر مناتی ہے تاکہ بھوک کے خاتمے اور ہر فرد کے لیے محفوظ، متوازن اور غذائیت سے بھرپور خوراک تک رسائی کی اہمیت کو اجاگر کیا جاسکے، اس سال کا موضوع ”بہتر خوراک اور بہتر مستقبل کے لیے ہاتھوں میں ہاتھ“ اس امر پر زور دیتا ہے کہ حکومتوں، کسانوں، کمیونٹیز اور ترقیاتی شراکت داروں کے درمیان اتحاد اور تعاون وقت کی اہم ضرورت ہے تاکہ ایک غذائی طور پر محفوظ دنیا کی تشکیل ممکن ہوسکے۔

(جاری ہے)

صدر آصف علی زرداری نے کہا کہ پاکستان میں زراعت معیشت کی ریڑھ کی ہڈی ہے اور کروڑوں افراد کے روزگار کا ذریعہ ہے مگر اس کے باوجود خوراک کی قلت اور غذائی قلت جیسے سنگین مسائل آج بھی درپیش ہیں جنہیں موسمیاتی تبدیلیوں، سیلاب اور خوراک کی بڑھتی ہوئی قیمتوں نے مزید گھمبیر بنا دیا ہے۔ انہوں نے کہا کہ آج بھی بہت سے خاندان صحت بخش غذا کے اخراجات برداشت کرنے سے قاصر ہیں اور بچے کم غذائیت کے اثرات سے متاثر ہو رہے ہیں۔

صدر مملکت نے کہا کہ سیلاب سے متاثرہ خاندانوں کے لیے امدادی سرگرمیاں، خوراک کے ضیاع کو روکنے کے اقدامات اور زرعی پیداوار بڑھانے کے پروگرام ان کوششوں کا اہم حصہ ہیں۔ انہوں نے کہا کہ پاکستان عالمی یوم خوراک کے موقع پراس عزم کا اعادہ کرتا ہے کہ وہ تمام شراکت داروں کے ساتھ مل کر یہ یقینی بنانے کے لیے کام کرتا رہے گا کہ کوئی بچہ بھوکا نہ سوئے اور ہر خاندان کو محفوظ، غذائیت سے بھرپور اور سستی خوراک دستیاب ہو۔ صدر نے کہا کہ خوراک کا تحفظ صرف حکومت کی ذمہ داری نہیں بلکہ ہم سب کی مشترکہ ذمہ داری ہے، آئیے ہم سب مل کر بہتر خوراک اور روشن مستقبل کی جانب قدم بڑھائیں۔