دہشتگردی کیخلاف مدد پر سری لنکا پاکستان کا معترف ہے،وزیرِ خارجہ شاہ محمود قریشی

پاکستان میڈیکل کے شعبے میں سری لنکا کی معاونت کر سکتا ہے، پاکستان کے معروف میڈیکل انسٹیٹیوٹس میں سری لنکن طلباء کو مزید 100 وظائف دیں گے، وزیر خارجہ

بدھ فروری 20:08

دہشتگردی کیخلاف مدد پر سری لنکا پاکستان کا معترف ہے،وزیرِ خارجہ شاہ ..
کولمبو (اُردو پوائنٹ اخبارتازہ ترین - این این آئی۔ 24 فروری2021ء) وزیرِ خارجہ مخدوم شاہ محمود قریشی نے کہا ہے کہ وزیرِ اعظم عمران خان کی سری لنکن ہم منصب سے ملاقات مفید رہی، سری لنکا معترف ہے پاکستان نے دہشت گردی پر قابو پانے میں ان کاساتھ دیا۔میڈیا سے گفتگو کرتے ہوئے انہوں نے بتایا کہ سری لنکا کے ساتھ دو طرفہ تعلقات ہمیشہ اچھے رہے ہیں، دورہ سری لنکا میں معاشی تعاون کے فروغ کے حوالے سے بھی بات ہوئی۔

وزیرِ خارجہ نے کہا کہ پاکستان اور سری لنکا کے درمیان عالمی فورمز پر ہم آہنگی ہے، دہشت گردی سے نمٹنے کے لیے دفاع اور سیکیورٹی میں تعاون ہمارے لیے یکساں اہمیت کا حامل ہے۔انہوں نے کہا کہ اقوامِ متحدہ، ہیومن رائٹس کونسل اور دیگر عالمی فورمز پر سری لنکا سے ہم آہنگی ہے، پاکستان نے سب سے پہلا ایف ٹی اے معاہدہ سری لنکا سے کیا۔

(جاری ہے)

شاہ محمود قریشی نے کہا کہ پاک سری لنکا وزرائے اعظم میں تجارت اور سرمایہ کاری بڑھانے کے لیے تبادلہ خیال کیا گیا، بزنس کونسل اجلاس میں معاشی روابط اور تجارتی تعلقات کے فروغ پر بات کریں گے۔

انہوں نے کہا کہ سری لنکا کو 15 ملین ڈالر کی کریڈٹ لائن کی پیشکش کی ہے، دونوں ملکوں کے درمیان دہشت گردی کے خلاف معلومات کے تبادلے اور تربیت کے لیے تعاون جاری ہے۔وزیرِ خارجہ نے بتایا کہ پاکستان میڈیکل کے شعبے میں سری لنکا کی معاونت کر سکتا ہے، پاکستان کے معروف میڈیکل انسٹیٹیوٹس میں سری لنکن طلباء کو مزید 100 وظائف دیں گے۔انہوں نے کہا کہ سری لنکا کے وزیرِ خارجہ سے علاقائی صورتِ حال پر تبادلہ خیال کریں گے، سارک فورم کو مزید فعال بنانے کے لیے بھی گفتگو ہو گی۔شاہ محمود قریشی نے کہا کہ کھیل کے میدان میں ہم سری لنکا کے ساتھ تعاون کر رہے ہیں، سری لنکاکی قدیم یونیورسٹی میں کلچرل سینٹر بنانے کا ارادہ ہے۔