خان سوپوری کی طرف سے شہید کشمیری نوجوانوںکو زبردست خراج عقیدت

جمعرات 25 فروری 2021 16:55

سرینگر (اُردو پوائنٹ اخبارتازہ ترین - این این آئی۔ 25 فروری2021ء) بھارت کے غیر قانونی زیر قبضہ جموںوکشمیر میں سینئر حریت رہنماء غلام محمد خان سوپوری نے گزشتہ روز بھارتی فوجیوںکے ہاتھوں ضلع اسلام آباد کے علاقے سری گفوارہ میں شہید ہونے والے کشمیری نوجوانوںکو زبردست خراج عقیدت پیش کیا ہے ۔ کشمیرمیڈیاسروس کے مطابق غلام محمد خان سوپوری نے سرینگر سے جاری ایک بیان میں کہاکہ بھارت کی ضد اور ہٹ دھرمی کی وجہ سے مقبوضہ علاقے میں نہتے کشمیریوںکا مسلسل قتل عام جاری ہے اور بھارت نے جموںوکشمیر کو ایک میدان جنگ میں تبدیل کردیا ہے ۔

انہوںنے کہاکہ جب تک مسئلہ کشمیر کو اس کے تاریخی پسِ منظر میں کشمیریوںکی خواہشات کے مطابق حل نہیں کیا جاتا مقبوضہ علاقے میں نہتے کشمیریوںکا قتل عام مسلسل جاری رہے گا ۔

(جاری ہے)

انہوںنے واضح کیاکہ طاقت کے استعمال سے قبرستان توآباد کئے جاسکتے ہیں لیکن کبھی بھی امن قائم نہیں ہوسکتا۔ انہوں نے کہا کہ بھارت کی ضد اورہٹ دھرمی کی وجہ سے جموںوکشمیر کی متنازعہ حیثیت تبدیل نہیں ہو سکتی ۔خان سوپور ی نے بھارت پر زوردیا کہ وہ جنوبی ایشیاء میں پائیدار امن و سلامتی کے قیام کیلئے زمینی حقائق کو تسلیم کرتے ہوئے تنازعہ کشمیر کے پر امن حل کیلئے عملی اقدامات کرے تاکہ خطے میں غیر یقینی صورتحال اور عدمِ استحکام کا خاتمہ ہوسکے ۔