پاکستان کو بلیک لسٹ میں دھکیلنے کی کوشش میں بھارت کو منہ کی کھانا پڑی ، حماد اظہر

اسلام آباد (اُردو پوائنٹ اخبارتازہ ترین - آن لائن۔ 26 فروری2021ء) وفاقی وزیر برائے صعنت وتجارت حماد اظہر نے کہا ہے کہ فنانشل ایکشن ٹاسک فورس (ایف اے ٹی ایف) کی طرف سے دیے گئے ٹاسک کو 90 فیصد مکمل کیا ہے۔ پاکستان کو دنیا کی تاریخ کا سب سے مشکل پلان دیا گیا، تین اہداف رہ گئے ہیں وہ بھی جلد پورے کر لیں گے، پاکستان کو بلیک لسٹ میں دھکیلنے کی کوشش میں بھارت کو منہ کی کھانا پڑی۔

ان خیالات اظہار انہوں نے میڈیا سے گفتگو کرتے ہوئے کیا ۔ انہوں نے کہا کہ حکومت ملی توٹاسک تھا ملک کو بلیک لسٹ سے بچاناہے، 27 نکاتی ایکشن پلان میں 24 کے اہداف حاصل کیے، فیٹف خود کہہ رہا ہے 90 فیصد کام ہوچکا ہے۔ان کا کہنا تھا کہ ہمارا ہدف فیٹف کے 27 نکاتی پوائنٹس پر عمل درآمد کرنا ہے، کورونا کے باوجود دیئے گئے ٹارگٹ کو ہم نے بڑی حد تک پوراکیا، اقدامات کے باعث پاکستان کواب بلیک لسٹ میں نہیں ڈالا جاسکتا۔

(جاری ہے)

وفاقی وزیر نے کہا کہ ہمارے پاس آپشن تھا کہ کورونا میں ہم رپورٹنگ نہ کریں، فیٹف نے کہا کہ بلیک لسٹنگ پاکستان کیلئے اب آپشن نہیں رہا، بھارت خود اس فورم پر ناکام ہوا۔حماد اظہر کا کہنا تھا کہ ٹیرر فنانسنگ کے بارے میں وکلا اور ججز کی ٹریننگ کریں گے، تین اہداف رہ گئے ہیں وہ بھی جلد پورے کر لیں گے۔ انہوں نے کہا کہ بھارت میں جو دہشتگردی ہورہی ہے دنیا کے سامنے ہے، مودی کے کارنامے کسی سے چھپے نہیں۔