عثمان قادر نے 9 ٹی ٹونٹی میچز میں زیادہ وکٹیں لینے کا ملکی ریکارڈ برابرکردیا

ہرارے (اردو پوائنٹ تازہ ترین اخبار ۔ 21 اپریل 2021ء ) قومی ٹیم کے لیگ سپنر عثمان قادر نے 9 ٹی ٹونٹی میچز میں زیادہ وکٹیں لینے کا ملکی ریکارڈ برابرکردیا ۔ 27 سالہ عثمان قادر اب تک 9 ٹی ٹونٹی میچز میں 13.50 کی اوسط سے 17 وکٹیں اپنے نام کرچکے ہیں جو پاکستان کی جانب سے اتنے ٹی ٹونٹی میچز کے بعد کسی بھی بائولر کی جانب سے مشترکہ طور پر حاصل کی جانے والی سب سے زیادہ وکٹیں ہیں۔

عثمان قادر کے علاوہ سابق فاسٹ بائولر محمد سمیع نے بھی اپنے پہلے 9 ٹی ٹونٹی میچز میں 15.5 کی اوسط سے 17 وکٹیں لی تھیں ۔ اس فہرست میں سابق آف سپنر سعید اجمل 12.50 کی اوسط سے 16 وکٹیں لے کر دوسرے نمبر پر موجود ہیں ۔ اس سے قبل 3 ٹی ٹونٹی میچز کی سیریز کے پہلے مقابلے میں پاکستان نے زمبابوے کو 11 رنز سے شکست دیکر سیریز میں 0-1 کی برتری حاصل کرلی ۔

(جاری ہے)

ہرارے سپورٹس کلب میں کھیلے جارہے سیریز کے پہلے میچ میں پاکستانی بیٹنگ لائن مکمل ناکام ثابت ہوئی تاہم محمد رضوان کی شاندار اننگز کی بدولت مقررہ 20 اوورز میں 149 رنز بنانے میں کامیاب رہی۔زمبابوے کی جانب سے تناشے کمن ہکاموے اور ویزلے میڈھویرے نے اننگز کا آغاز کیا، میڈھویرے نے جارحانہ آغاز کیا تاہم وہ 14 رنز پر اپنی وکٹ گنوا بیٹھے جس کے بعد اپنا پہلا میچ کھیلنے والے تدی وانشے مرومانی کریز پر آئے اور پہلی ہی گیند پر اپنی وکٹ گنوا دی۔

تناشے کمن ہکاموے اور کریگ ارون کے درمیان تیسری وکٹ کے لیے 56 رنز کی اہم شراکت قائم کی تاہم محمد حفیظ نے اس شراکت کا خاتمہ کیا، کمن ہکاموے29 رنز بنانے کے بعد آؤٹ ہوئے، اگلے ہی اوور میں ایرون کی ہمت بھی 34 رنز پر جواب دے گئی۔ کپتان سین ولیمز صرف 9 رنزبناسکے۔ وکٹ کیپر بیٹسمین ریگس چکابوا 3 رنز کے مہمان ثابت ہوئے۔ ریان برل اور لیوک جونگوے نے آخری لمحات میں اچھا کھیل پیش کیا تاہم وہ ٹیم کو جیت سے ہمکنار نہ کرواسکے۔

قومی ٹیم کی جانب سے عثمان قادر نے 3، محمد حسنین 2 جب کہ محمد حفیظ اور حارث رؤف نے ایک ایک وکٹ حاصل کی۔اس سے قبل زمبابوے نے ٹاس جیت کر پاکستان کو بیٹنگ کی دعوت دی۔ پاکستان کی جانب سے محمد رضوان اور بابراعظم نے اننگز کا آغاز کیا۔ 8 کے مجموعی سکور پر مزاربانی نے بابراعظم کو آؤٹ کردیا، انہوں نے صرف 2 رنز بنائے۔ بابر کے بعد رضوان کا ساتھ نبھانے فخر زمان میدان میں اترے اور دونوں نے 34 رنز کی شراکت داری قائم کی، اس موقع پر فخر زمان کو مدھیویرے نے 13 رنز پر آؤٹ کردیا۔

تیسرے آؤٹ ہونیوالے کھلاڑی محمد حفیظ تھے جو صرف 5 رنز بناسکے۔ اپنا پہلا ٹی ٹونٹی کھیلنے والے دانش عزیز 15 رنز کے مہمان ثابت ہوئے،حیدر علی ایک بار پھر ناکام ثابت ہوئے، وہ صرف 5 رنز بناسکے۔ فہیم اشرف صرف ایک رن بناسکے۔ محمد رضوان نے ایک اینڈ سنبھالے رکھا اور اپنی نصف سنچری مکمل کی، وہ 82 رنز پر ناٹ آؤٹ واپس آئے، ان کی اننگز میں 10 چوکے اور ایک چھکا شامل تھا۔

تین میچوں کی سیریز کے پہلے میچ میں پاکستان کی جانب سے دانش عزیز آج اپنا ڈیبیو کر رہے ہیں۔ پاکستان اور زمبابوے کے درمیان ٹی20 سیریز کے اگلے دو میچز بھی ہرارے میں 23 اور 25 اپریل کو کھیلے جائیں گے اور سٹیڈیم میں شائقین کو داخلے کی اجازت نہیں ہو گی۔ ٹی20 سیریز کے بعد دونوں ٹیموں کے درمیان دو ٹیسٹ میچوں کی سیریز بھی کھیلی جائے گی۔ میچ کے لیے پاکستانی ٹیم میں بابراعظم (کپتان)، محمد رضوان، فخر زمان، محمد حفیظ، حیدر علی، دانش عزیز، محمد نواز، فہیم اشرف، عثمان قادر، محمد حسنین اور حارث رؤف شامل ہیں جب کہ زمبابوے کی ٹیم سین ولیمز (کپتان)، تِناشے کموہکاموے، ویزلے مدہیورے، تدیوَناشے مرومانی، کریگ اروائن، رائن بَرل، ریجِس چاکبوا، لیوک جونگوے، ویلنگٹن مساکڈزا، بلیسنگ موزاربانی اور رِچرڈ نراوا پر مشتمل ہے ۔

1