برطانوی صحافی نے وزیراعظم بورس جانسن کی جانب سے کورونا کیسز بڑھنے کے باوجود بھارت کیلیے سرحدیں بند نہ کرنے کا بھانڈا پھوڑ دیا

اتوار 16 مئی 2021 16:25

لندن (اُردو پوائنٹ اخبارتازہ ترین - این این آئی۔ 16 مئی2021ء) نامور برطانوی صحافی نے برطانوی وزیراعظم بورس جانسن کی جانب سے کورونا کیسز بڑھنے کے باوجود بھارت کے لیے سرحدیں بند نہ کرنے کا بھانڈا پھوڑ دیا۔ برطانیہ کے معروف صحافی ریچل ویئر ماؤتھ کے مطابق برطانوی حکومت کو بہت پہلے سے معلوم تھا کہ ملک میں کورونا کیسز میں اضافہ ہوگا۔

(جاری ہے)

برطانوی صحافی ریچل ویئرماؤتھ نے انکشاف کیا کہ سرکاری ذرائع نے برطانوی اخبار کو بتایا کہ کورونا کے بڑھتے کیسز کی وجہ سے یہ بہت واضح تھا کہ برطانیہ کو بھارت سے اپنی سرحدیں بہت پہلے بند کر دینی چاہیے تھیں۔

ریچل ویئرماؤتھ نے کہا کہ بدقسمتی سے ایسا نہیں ہوا کیونکہ برطانوی وزیراعظم بورس جانسن بھارتی وزیراعظم نریندر مودی کو ناراض نہیں کرنا چاہتے تھے۔خیال رہے کہ بھارت میں بڑھتے کورونا کیسز کے باوجود برطانوی وزیراعظم بورس جانسن نے وہاں سے مسافروں کی آمد پر پابندی لگانے کے بجائے کم کیسز والے ملک پاکستان کے مسافروں پر پابندی عائد کر دی تھی۔ بورس جانسن کے اس فیصلے پر سخت تنقید کی گئی اور بعدازاں برطانیہ کو بھارت سے مسافروں پر پابندی عائد کرنا پڑی۔