شہر کے حالات کا جائزہ لینے کیلئے وزیراعظم عمران خان بغیر پروٹوکول اسلام آباد کی سڑکوں پر نکل آئے

وزیراعظم عمران خان نے گاڑی سے باہر نکل کر ریڑھی بانوں سے ملاقات کی، وزیراعظم کے خود گاڑی چلا کر اسلام آباد کی ریڑھی بان مارکیٹ کے دورے کی ویڈیو سامنے آ گئی

Danish Ahmad Ansari دانش احمد انصاری پیر 21 جون 2021 19:01

شہر کے حالات کا جائزہ لینے کیلئے وزیراعظم عمران خان بغیر پروٹوکول اسلام ..
اسلام آباد (اُردو پوائنٹ، اخبار تازہ ترین 21جون 2021) شہر کے حالات کا جائزہ لینے کیلئے وزیراعظم عمران خان بغیر پروٹوکول اسلام آباد کی سڑکوں پر نکل آئے، وزیراعظم کے خود گاڑی چلا کر اسلام آباد کی ریڑھی بان مارکیٹ کے دورے کی ویڈیو سامنے آ گئی۔ تفصیلات کے مطابق وزیراعظم عمران خان شہر میں کاروبار کے حالات کا جائزہ لینے کے لیے ایک مرتبہ پھر بغیر پروٹوکول خود گاڑی ڈرائیو کرتے ہوئے سڑکوں پر نکل آئے۔

وزیراعظم عمران خان نے گاڑی سے باہر نکل کر ریڑھی بانوں سے ملاقات کی اور اُن سے کاروبار سے متعلق سوالات کیے۔ وزیراعظم نے ریٹ لسٹ کا بھی جائزہ لیا اور دیکھا کہ کہیں کوئی چیز ریٹ لسٹ کے برخلاف تو فروخت نہیں ہو رہی ہے۔

(جاری ہے)

وزیراعظم عمران خان کی یہ ویڈیو سوشل میڈیا پر وائرل ہو گئی۔

واضح رہے کہ اس سے قبل بھی رمضان میں وزیراعظم عمران خان نے اسلام آباد میں مارکیٹ کا اچانک دورہ کیا تھا۔ اس وقت بھی وزیراعظم عمران خان اپنی گاڑی خود چلا رہے تھے ، وزیراعظم کے ہمراہ چیئرمین سی ڈی اے عامر احمد علی بھی موجود تھے ، تاہم وزیراعظم کے ساتھ وزیراعظم آفس کے عملے کا کوئی اہلکار نہیں تھا۔بتایا گیا کہ وزیراعظم نے ارجنٹائن پارک ، ٹریل فائیو ، مرغزار اور مارگلہ روڈ کا دورہ کیا اور شجرکاری مہم میں لگائے گئے پودوں کو بھی چیک کیا ، اس کے علاوہ وزیراعظم نے اسلام آباد میں مرمت کی گئی سڑکوں کا معائنہ بھی کیا جب کہ وزیراعظم کو چیئرمین سی ڈی اے نے ترقیاتی کاموں پر بریفنگ دی ، وزیراعظم نے مختلف عوامی مقامات پر کورونا ایس او پیز پر عملدرآمد کا جائزہ بھی لیا۔

ذرائع کا کہنا ہے کہ وزیراعظم عمران خان نے جی 11مرکز کا بھی دورہ کیا ، وزیراعظم نے مختلف دکانداروں اور ریڑھی بانوں سے ان کے مسائل پوچھے اور وزیراعظم عمران خان کی ریڑھی بانوں کو ماسک پہننے کی بھی ہدایت کی۔تاہم مسلم لیگ ن کی رہنما مریم نواز نے سخت ردعمل دیا تھا۔ مسلم لیگ ن کی نائب صدر مریم نواز نے والد اور سابق وزیراعظم میاں نواز شریف کی ایک یادگار ویڈیو جاری کی ہے جس میں انہیں عوام کے گرد بغیر پروٹوکول کے دیکھا جا سکتا ہے۔

مریم نواز کی جانب سے یہ ویڈیو وزیراعظم عمران خان کے بازار کے دورے پر ردعمل میں شئیر کی گئیتھی۔انہوں نے سماجی رابطے کی ویب سائٹ ٹوئٹر پر ٹوئٹ میں ویڈیو شیئر کرتے ہوئے وزیراعظم کو تنقید کا نشانہ بناتے ہوئے کہا کہ جب منتخب وزیر اعظم عوام میں نکلتے ہیں تو شہر میں کرفیو نہیں لگا ہوتا۔