گوگل کا پاکستان سمیت پانچ ایشیائی ممالک کیلئے 75 لاکھ ڈالر کووڈگرانٹ کا اعلان

نیویارک(اُردو پوائنٹ اخبارتازہ ترین - این این آئی۔ 31 جولائی2021ء) گوگل نے پاکستان سمیت 5 ایشیائی ممالک کے لیے کووڈ19 ریلیف کے تحت 75 لاکھ ڈالر گرانٹ اور دیگر اقسام کی معاونت کا اعلان کردیا۔میڈیارپورٹس کے مطابق اس حوالے سے گوگل ڈاٹ آر جی کے بیان میں کہا گیا کہ گوگل نے یہ اعلان اس لیے کیا ہے کہ وہ ممالک جہاں اس وقت کورونا وائرس کے کیسز میں اضافہ ہورہا ہے وہاں وبا کے موجودہ بحران کا خاتمہ کیا جاسکے۔

گوگل کا انسان دوست ادارہ Google.org، یونیسف کو بھی 15 لاکھ ڈالر کی گرانٹ فراہم کرے گا تاکہ پاکستان، تھائی لینڈ، ملائیشیا، ویتنام اور فلپائن سمیت 5 ممالک میں کورونا وائرس سے نمٹنے کے لیے درکار فوری معاونت فراہم کی جاسکے۔اس گرانٹ کو استعمال میں لاتے ہوئے یونیسیف کورونا ویکسی نیشن سینٹرز میں خواتین ویکسینیٹرز تعینات کرے گا تاکہ پاکستان میں ویکسین لگانے والی خواتین کی تعداد میں اضافہ کیا جا سکے اور ویکسین کمیونیکیشن کو فروغ دیا جاسکے۔

(جاری ہے)

علاوہ ازیں یونیسیف، وائرس کے پھیلا ئوکو روکنے اور مستقبل میں آنے والی کورونا وائرس کی نئی لہروں سے ہونے والی ممکنہ اموات میں کمی کے لیے حکومتوں اور کمیونیٹیز کی مدد بھی جاری رکھے گا۔مذکورہ اعلان کرتے ہوئے گوگل کے کنٹری ڈائریکٹر برائے پاکستان فرحان قریشی نے کہا کہ کورونا وائرس کے کیسز میں حالیہ اضافہ ہمارے نظام صحت پر غیر معمولی دبائوکا باعث بن رہا ہے اور گوگل ڈاٹ او آر جی کی جانب سے یونیسیف کے لیے اِس گرانٹ کا مقصد، اس نازک وقت میں، پاکستان کے لیے تعاون میں مزید اضافہ کرنا ہے۔

انہوں نے کہا کہ ہم معلومات اور تمام عوامل کی مکمل فراہمی یقینی بنانے پر توجہ مرکوز رکھیں گے تاکہ تمام پاکستانی باخبر، مربوط رہیں اور،اس بحران میں محفوظ رہیں۔دوسری جانب مشرقی ایشیا اور بحرالکاہل کے لیے یونیسیف کی ریجنل ڈائریکٹر کیرن ہلشوف نے کہا کہ ہم گوگل ڈاٹ او آر جی کی جانب سے یونیسیف کے لیے امداد کی فراہمی پر مشکور ہیں۔