صنعتی و تجارتی اداروںمیں حفاظتی قوانین پر عملدرآمد نہیں کیا جاتاہے ،حبیب الدین جنیدی

کراچی (اُردو پوائنٹ اخبارتازہ ترین - این این آئی۔ 16 ستمبر2021ء) پیپلزلیبر بیورو سندھ کے صدر،سینئر مزدور رہنما حبیب الدین جنیدی نے گذشتہ روز نادرن بائی پاس کراچی میں واقعہ بیٹری کے گودام میں آتشزدگی سے جھلس کر جاں بحق ہونے والے مزدور کی شہادت پر شدید رنج والم کا اظہار کرتے ہوئے کہا کہ پے درپے وقوع پذیر ہونے والے المناک صنعتی حادثات نے صنعتوں کے مالکان اور مزدوروں کے حقوق کے تحفظ کے سرکاری و ریاستی اداروں کی انتظامی صلاحیتوں اور مجرمانہ غفلت کا پردہ چاک کرکے رکھ دیا ہے ۔

انہوں نے کہا کہ ابھی دو تین ہفتہ قبل ہی مہران ٹاؤن کورنگی میں واقعہ فیکٹری میں آتشزدگی کے نتیجہ میں شہید ہونے والے 17مزدوروں کی یاد دل سے محو بھی نہیں ہوئی تھی کہ ایک اور دلدوز واقعہ بیٹری گودام میں پیش آگیا جس کے نتیجہ میں ایک مزدور شہید جبکہ تین مزید بُری طرح جھلس کر زندگی و موت کی کشمکش میں مبتلا ہیں۔

(جاری ہے)

حبیب الدین جنیدی نے کہا کہ یہ انسانیت سوز واقعات اس حقیقت کو ثابت کررہے ہیں کہ صنعتی و تجارتی اداروں کے کارکنوں کی جان اور اُن کی زندگیوں کے تحفظ کے لئے بنائے گئے حفاظتی قوانین پر عملدرآمد نہیں کیا جاتابلکہ اُنہیں سراسر نظر انداز کرکے انسانی زندگیوں سے کھیلا جارہا ہے ۔

سینئر مزدور رہنما نے ایک مرتبہ پھر اپنے اس مطالبہ کو دُہرایا کہ قانون کی رٹ قائم کرنے کے لئے فوری طور پر ایک اعلیٰ اختیارتی کمیٹی قائم کی جائے جو پورے صوبہ میں واقع کارخانوں اور کام کرنے کی جگہوں کا دورہ اور اس امر کا تعین کرے کہ مزدور قوانین کی خلاف ورزی میں کون کون سے صنعتی و حکومتی ادارے ملوث ہیں جس کے نتیجہ میں بے گناہ انسان اپنی زندگیوں سے محروم ہورہے ہیں۔حبیب الدین جنیدی نے یہ مطالبہ بھی کیا کہ گذشتہ روز بیٹری کے گودام کی آتشزدگی کے واقعہ کی ایف آئی آر رجسٹرڈ کرکے ملزمان کو گرفتار کیاجائے اور جاں بحق ہونے والے مزدور کے لواحقین کو 25لاکھ روپئے کی امداد فوری طور پر ادا کی جائے۔