سعودیہ ؛ چھٹی پر پاکستان گئے کارکنوں کے ’ہروب‘ سے متعلق سوالات کی وضاحت آگئی

خروج وعودہ پر اپنے ملک جانے والے غیر ملکی کارکنان کا ہروب فائل نہیں ہو سکتا کیوں کہ ہروب کا مطلب ہے آجر کے پاس سے فرار ہونا جب کہ چھٹی پر گئے ہوئے کارکن آجر کی مرضی سے خروج وعودہ پر جاتے ہیں

ساجد علی جمعرات 28 اکتوبر 2021 10:55

سعودیہ ؛ چھٹی پر پاکستان گئے کارکنوں کے ’ہروب‘ سے متعلق سوالات کی ..

ریاض ( اُردو پوائنٹ اخبارتازہ ترین ۔ 28 اکتوبر 2021ء ) سعودی عرب سے چھٹی پر پاکستان گئے کارکنوں کے ہروب سے متعلق سوالات کی وضاحت آگئی۔ اُردو نیوز کے مطابق جوازات سے ہروب کے متعلق قوانین کے بارے میں بعض افراد کی جانب سے دریافت کیا گیا ، جن میں سے ایک شخص نے پوچھا کہ پاکستان چھٹی پر گیا تھا مگر پابندی کی وجہ سے واپس نہیں جاسکا اسی لیے کفیل کی جانب سے ہروب فائل کر دیا گیا ، کیا اب میں دوبارہ دوسرے ویزے پرسعودی عرب جاسکتا ہوں؟۔

اس کے جواب میں وضاحت کی گئی ہے کہ جوازات کے قوانین کے مطابق خروج وعودہ پر اپنے ملک جانے والے غیر ملکی کارکنان کا ہروب فائل نہیں ہو سکتا ، کیوں کہ ہروب کا مطلب ہے آجر کے پاس سے فرار ہونا جب کہ چھٹی پر گئے ہوئے کارکن آجر کی مرضی سے خروج وعودہ پر جاتے ہیں۔

(جاری ہے)

جوازات کی جانب سے یہ بھی بتایا گیا ہے کہ خروج وعودہ ویزا کارکن نہیں بلکہ آجر کے ابشر یا مقیم پورٹل سے لگایا جاتا ہے اس لیے خروج وعودہ پر جانے والوں کو ہروب کی کیٹیگری میں شامل نہیں کیا جا سکتا۔

اسی طرح خروج وعودہ قانون کی خلاف ورزی کے بعد نئے ویزے پر سعودیہ آنے کے حوالے سے وضاحت جاری کردی گئی ، سعودی محکمہ پاسپورٹ اینڈ امیگریشن کے ٹوئٹر پر ایک شخص نے دریافت کیا کہ 2 برس قبل خروج و عودہ ویزے پر سعودی عرب سے جانے والا کارکن کیا نئے ویزے پر مملکت آ سکتا ہے؟ اس کے جواب میں جوازات کی جانب سے کہا گیا کہ ایسے تارکین وطن جو خروج و عودہ پر جا کر وقت مقررہ پر واپس نہیں آتے انہیں ’خرج ولم یعُد‘ کی کیٹگری میں شامل کر دیا جاتا ہے ، ’خرج ولم یعد‘ کی اصطلاح ان تارکین وطن کے لیے استعمال کی جاتی ہے جو خروج و عودہ ویزے پر جا کر واپس نہیں آتے۔

معلوم ہوا ہے کہ ایسے تارکین وطن جو خروج و عودہ قانون کی خلاف ورزی کے مرتکب ہوتے ہیں ان پر مملکت آنے کے لیے 3 برس کی پابندی عائد کی جاتی ہے ، ایسے افراد کے لیے ممنوعہ مدت کے دوران دوبارہ مملکت آنے کی ایک ہی صورت ہے کہ ان کے سابق کفیل یعنی سپانسر ان کے لیے نیا ویزہ جاری کریں بصورت دیگر ایسے افراد دوسرے ورک ویزے پر تین برس کی مقرر کردہ ممنوعہ مدت ختم ہونے کے بعد ہی آ سکتے ہیں۔