چٹاگانگ ٹیسٹ، پاکستانی ٹیم 286 رنز بنا کر ڈھیر

بنگلا دیش کو 44 رنز کی سبقت

Zeeshan Mehtab ذیشان مہتاب اتوار 28 نومبر 2021 14:05

چٹاگانگ ٹیسٹ، پاکستانی ٹیم 286 رنز بنا کر ڈھیر
چٹاگانگ (اردو پوائنٹ تازہ ترین اخبار ۔ 28 نومبر 2021ء ) چٹاگانگ ٹیسٹ کے تیسرے روز پاکستانی ٹیم اپنی پہلی اننگز میں 286 رنز بنا کر پوویلین لوٹ گئی ہے ۔ چٹانگ کے ظہور احمد چوہدری سٹیڈیم میں جاری میچ کے تیسرے روز پاکستان نے اپنی پہلی نامکمل اننگز کا آغاز کیا تو عابد علی 93 اور عبداللہ شفیق 52 رنز کے ساتھ وکٹ پر موجود تھے۔ تاہم کھیل کے پہلے ہی اوور میں تائیج الاسلام نے پہلے عبداللہ شفیق کو ایل بی ڈبلیو کیا اور پھر اگلی ہی گیند پر اظہر علی کو بھی گولڈن ڈک پر پویلین کی راہ دکھا دی۔

قومی ٹیم کے کپتان بابراعظم بھی 10 رنز بنا کر مہدی حسن مرزا کی گیند پر بولڈ ہو گئے ۔ دوسری جانب عابد علی نے شاندار بیٹنگ کا سلسلہ جاری رکھا اور اپنی سنچری مکمل کی ، عابد علی 133 رنز بنا کر آؤٹ ہوئے۔

(جاری ہے)

فواد عالم 8 اور محمد رضوان 5 رنز بنا سکے جب کہ حسن علی بھی 12 رنز کے مہمان ثابت ہوئے۔ ساجد خان 5 اور نعمان علی 8 رنز بنا کر پوویلین لوٹ گئے ۔ فہیم اشرف نے 38 رنز کی اننگز کھیلی جبکہ شاہین شاہ آفریدی 13 رنز بنا کر ناٹ آؤٹ رہے۔

بنگلا دیش کی جانب سے تیج الاسلام نے تباہ کن بولنگ کرتے ہوئے 7 وکٹیں حاصل کیں جبکہ دو وکٹیں عبادت حسین اور ایک مہدی حسن مرزا کے حصے میں آئی۔ خیال رہے کہ چٹاگانگ ٹیسٹ میں بنگلا دیش نے ٹاس جیت کر پہلے بیٹنگ کرتے ہوئے پہلی اننگز میں 330 رنز سکور کیے تھے، بنگلا دیش کی جانب سے لٹن داس نے سنچری سکور کی تھی جبکہ مشفیق الرحیم نروس نائنٹیز کا شکار ہو گئے تھے۔ پاکستان کی جانب سے حسن علی نے شاندار بولنگ کا مظاہرہ کرتے ہوئے 5 کھلاڑیوں کو آؤٹ کیا تھا جبکہ دو دو وکٹیں شاہین آفریدی اور فہیم اشرف کے حصے میں آئی تھیں۔

متعلقہ عنوان :