آئی سی سی نے سالانہ درجہ بندی کی فہرست جاری کر دی

مردوں میں بھارت اور خواتین میں آسٹریلیا نے بدستور پہلی پوزیشن برقرار

منگل 5 مئی 2026 20:15

آئی سی سی نے سالانہ درجہ بندی کی فہرست جاری کر دی

لاہور (اُردو پوائنٹ اخبارتازہ ترین - این این آئی۔ 05 مئی2026ء) انٹر نیشنل کرکٹ کونسل (آئی سی سی)کی جانب سے سالانہ درجہ بندی کی فہرست جاری کر دی گئی جس کے مطابق مردوں میں بھارت اور خواتین میں آسٹریلیا نے بدستور پہلی پوزیشن برقرار رکھی ہے۔نئی درجہ بندی میں مئی 2025 کے بعد کھیلے گئے مقابلوں کو مکمل اہمیت دی گئی ہے جبکہ اس سے پہلے کے دو برس کے مقابلوں کو نصف اہمیت دی گئی ہے۔

مردوں کی فہرست میں بھارت 275 پوائنٹس کے ساتھ سرفہرست ہے تاہم انگلینڈ کے ساتھ اس کا فرق کم ہو کر 13 پوائنٹس رہ گیا ہے۔انگلینڈ 262 پوائنٹس کے ساتھ دوسرے اور آسٹریلیا 258 پوائنٹس کے ساتھ تیسرے نمبر پر ہے۔ ابتدائی سات ٹیموں کی پوزیشن میں کوئی تبدیلی نہیں آئی، جن میں نیوزی لینڈ، جنوبی افریقہ، پاکستان اور ویسٹ انڈیز شامل ہیں۔

(جاری ہے)

دیگر تبدیلیوں میں سری لنکا چھ پوائنٹس کی کمی کے بعد نویں نمبر پر چلی گئی ہے جبکہ بنگلہ دیش اس سے آگے نکل گیا ہے۔

امریکہ نے نمایاں بہتری دکھاتے ہوئے 13ویں پوزیشن حاصل کی جبکہ نیپال اور اٹلی نے بھی درجہ بندی میں ترقی کی۔ اس کے علاوہ اسپین، قبرص اور ایسواتینی نے بھی اپنی پوزیشن بہتر بنائی جبکہ موزمبیق کو سب سے زیادہ نقصان اٹھانا پڑا اور وہ 15 درجے نیچے چلا گیا۔خواتین کی درجہ بندی میں آسٹریلیا 287 پوائنٹس کے ساتھ پہلے نمبر پر ہے جبکہ انگلینڈ 275 اور بھارت 264 پوائنٹس کے ساتھ بالترتیب دوسرے اور تیسرے نمبر پر ہیں۔

نیوزی لینڈ، جنوبی افریقہ اور ویسٹ انڈیز چوتھے سے چھٹے نمبر پر موجود ہیں جبکہ سری لنکا ساتویں نمبر پر رہتے ہوئے چھٹی ٹیم کے قریب پہنچ گئی ہے۔دیگر نمایاں تبدیلیوں میں امریکہ نے 22ویں سے 20ویں اور جرمنی نے 35ویں سے 29ویں پوزیشن حاصل کی۔ نئی درجہ بندی کے بعد خواتین کی فہرست میں 78 ٹیمیں شامل ہیں جبکہ کم مقابلے کھیلنے کے باعث کچھ ٹیمیں فہرست سے باہر ہو گئی ہیں۔