صوبے یکم جون تک گندم کی خریداری کے اہداف مکمل کریں، شہباز شریف

درآمد کی جانے والی گندم کی صوبوں میں شفاف تقسیم کے لیے فوری کمیٹی قائم کی جائے، وزیراعظم

پیر 16 مئی 2022 23:18

صوبے یکم جون تک گندم کی خریداری کے اہداف مکمل کریں، شہباز شریف

اسلام آباد (اُردو پوائنٹ اخبارتازہ ترین - این این آئی۔ 16 مئی2022ء) وزیراعظم شہباز شریف نے صوبوں کی طرف سے گندم کی خریداری کے اہداف پورے نہ کرنے پر شدید برہمی کا اظہار کرتے ہوئے کہا ہے کہ صوبے یکم جون تک گندم کی خریداری کے اہداف حاصل کریں، باہر سے درآمد کی جانے والی گندم کی صوبوں میں شفاف تقسیم کے لیے فوری کمیٹی قائم کی جائے۔ پیر کو وزیراعظم آفس کے میڈیا ونگ سے جاری بیان کے مطابق وزیراعظم نے کہا کہ غریب عوام کی خدمت اولین فریضہ ہے۔

عوام کو کسی صورت مشکل میں نہیں ڈالا جا سکتا۔

(جاری ہے)

وفاقی حکومت ہر صورت کم قیمت پر آٹا فراہم کرے گی،کسی قسم کی کوتاہی کو برداشت نہیں کیا جاسکتا۔ وزیر اعظم نے کہا کہ وفاقی حکومت سیاست سے بالاتر ہو کرخیبرپختونخوا حکومت کی بھی ہر ممکن مدد کرے گی۔وزیر اعظم نے کہاکہ وفاقی حکومت ہر ممکن مدد فراہم کر رہی ہے، صوبے یکم جون تک گندم خریداری کے اہداف پورے کریں۔وزیراعظم نے وفاقی وزیر برائے نیشنل فوڈ سکیورٹی کو ہدایت کی کہ باہر سے درآمد کی جانے والی گندم کی صوبوں میں شفاف تقسیم کے لیے فوری کمیٹی قائم کی جائے اوربہترین معیار کی گندم درآمد کو یقینی بنایا جائے۔