فیصل آباد، کاشتکاروں کو گندم کی اگیتی کاشت کیلئے زمین کی تیاری فوری شروع کرنے کی ہدایت

جمعہ 16 ستمبر 2022 16:02

فیصل آباد (اُردو پوائنٹ اخبارتازہ ترین - اے پی پی۔ 16 ستمبر2022ء) ماہرین نے کاشتکاروں کو گندم کی اگیتی کاشت کیلیے زمین کی تیاری فوری شروع کرنےاور داب کے ذریعے جڑ ی بوٹیاں ختم کرنے پر بھی خصوصی توجہ دینے کی ہدایت کی ہے ۔ڈویژنل ڈائریکٹرمحکمہ زراعت توسیع فیصل آبادچوہدری عبدالحمیدنے کہا کہ گندم کی بہتر پیداوار کے حصول کیلئے بروقت کاشت، شرح بیج اور آبپاشی کے ساتھ ساتھ زمین کی تیاری انتہائی اہمیت کی حامل ہوتی ہے،اس ضمن میں زرعی ماہرین کاشتکاروں کو تمام ممکن رہنمائی فراہم کررہے ہیں جبکہ بعض مقامات پر کسان میلے منعقد کرکے کاشتکاروں کو گندم کی کاشت کے بارے میں جدید زرعی سفارشات سے بھی آگاہ کیاجارہاہے۔

انہوں نے کہا کہ جدید ٹیکنالوجی اور ماہرین زراعت کی سفارشات پر عمل کرکے کاشتکار بہتر پیداوار حاصل کر سکتے ہیں۔

(جاری ہے)

انہوں نے کاشتکاروں کو بہتر پیداوار حاصل کرنے کیلئے گندم سمیت دیگر فصلوں ربیع کا سیڈ کارپوریشن کا تصدیق شدہ بیج استعمال کرنے کی بھی ہدایت کی اور کہا کہ کاشتکار ترقی دادہ اقسام کا تصدیق شدہ بیج تمام شہروں میں قائم پنجاب سیڈ کارپوریشن کے ڈپوؤں اور ڈیلرز سے حاصل کر سکتے ہیں،اس کے علاوہ کاشتکار اچھی شہرت کی حامل پرائیویٹ سیڈ کمپنیوں کی طرف سے سپلائی کردہ بیج بھی استعمال کرسکتے ہیں۔

انہوں نے بتایاکہ حکومت نے تمام شہروں میں سیڈ گریڈرز کی سہولیات فراہم کررکھی ہیں جہاں سے سیڈ گریڈنگ کے بعد بیج کو کاشت کیا جاسکتاہے۔ انہوں نے بتایاکہ 20نومبر تک گندم کی بوائی کیلئے بیج کی شرح 50کلو گرام فی ایکڑ اور 21 نومبر تا 15 دسمبر تک 60کلو گرام فی ایکڑ ہونی چاہیے۔ انہوں نے بتایاکہ گندم کی اقسام چکوال 50، لاثانی 2008، آری2011، فیصل آباد 2008 وغیرہ زیادہ شگوفے بناتی ہیں اسلئے ان کی بروقت کاشت کی صورت میں مناسب وتر کے باعث بیج کی مقدار کو 5کلو گرام فی ایکڑ تک کم بھی کیاجا سکتاہے۔