سب کھلاڑیوں کی شادی کروانے کے بعد شادی کرونگا: بابر اعظم

میں آج بھی بال پِکر کو دیکھ کر شکر ادا کرتا ہوں کہ ایک دن میں بھی اس مقام پر تھا لیکن اللہ کا شکر ہے اس نے مجھے یہ مقام عطا کیا: قومی کپتان

ذیشان مہتاب جمعرات 23 فروری 2023 12:58

سب کھلاڑیوں کی شادی کروانے کے بعد شادی کرونگا: بابر اعظم

لاہور (اردو پوائنٹ تازہ ترین اخبار ۔ 23 فروری 2023ء ) قومی ٹیم کے کپتان بابراعظم کا کہنا ہے کہ وہ سب کھلاڑیوں کی شادی کروانے کے بعد شادی کریں گے۔ نجی میڈیا کو دیے گئے انٹرویو کے دوران میزبان نے بابر اعظم سے رواں برس ساتھی کرکٹرز کے شادی کے بندھن میں بندھنے اور قومی کرکٹ ٹیم کے کپتان کے تاحال کنوارے ہونے کا سوال کیا؟ جس پر بابر اعظم کا کہنا تھا کہ’ میں نے سوچ لیا ہے اس بار ان سب کی شادی کروانے کے بعد میں خود بھی شادی کرلوں گا‘۔

(جاری ہے)

دوسری جانب بابر نے اپنے بچپن کا ذکر کرتے ہوئے کہ’ میں آج بھی جب سٹیڈیم میں بال پِکر کو دیکھوں تو شکر ادا کرتا ہوں اوریاد کرتا ہوں کہ ایک دن میں بھی اس مقام پر تھا لیکن اب اللہ کا شکر ہے اس نے مجھے یہ مقام عطا کیا‘۔ بابر نے نوجوانوں کو مشورہ دیتے ہوئے کہا کہ ‘انسان کو چاہیے خود پر بھروسہ رکھے کیوں کہ انسان جو ٹھان لے اور سچے دل سے لگن کے ساتھ محنت کرے تو وہ اپنا مقصد ضرور حاصل کرلیتا ہے‘۔ قومی کپتان کا کہنا تھا کہ ’انسان جتنا نیک نیتی کے ساتھ خود پر بھروسہ کرے گا اس کے لیے راستے اتنے ہی کھلتے جائیں گے‘۔