Live Updates

کرکٹ میں صفر پر آؤٹ ہونے کو Duck کیوں کہا جاتا ہی

پرنس آف ویلز ایک میچ میں صفر پر آؤٹ ہوئے۔اگلے دن اخبار نے لکھا کہ وہ ''بطخ کے انڈے پر پویلین لوٹ گئے‘یہ جملہ چھا گیا

ہفتہ 27 ستمبر 2025 20:43

کرکٹ میں صفر پر آؤٹ ہونے کو Duck کیوں کہا جاتا ہی

لندن (اُردو پوائنٹ اخبارتازہ ترین - آن لائن۔ 27 ستمبر2025ء)جب کوئی بلے باز اننگز کا آغاز کرتے ہی بغیر رن بنائے آؤٹ صفر پر آؤٹ ہوجائے تو کرکٹ کی اصطلاح میں اسے Duck کہا جاتا ہے۔ٹی وی اسکرین پر بھی ایسے موقع پر بطخ کی تصویر دکھائی جاتی ہے، لیکن کبھی آپ نے سوچا ہے کہ کرکٹ میں صفر پر آؤٹ ہونے کو بطخ یعنی ڈک کیوں کہا جاتا ہی ، آخر کرکٹ کا Duck سے کیا تعلق ہی اگر آپ نہیں جانتے تو اس کے پیچھے کی منفرد کہانی ہم آپ کو بتاتے ہیں۔

اصل میں یہ اصطلاح بطخ کے انڈے سے منسوب ہے، کیونکہ انڈے کی شکل صفر جیسی ہوتی ہے۔ اس لیے جب کھلاڑی صفر پر آؤٹ ہوتا ہے تو اسے انڈے پر آؤٹ ہونا بھی کہا جاتا ہے۔1866 میں ایک تاریخی واقعہ پیش آیا جب پرنس آف ویلز ایک میچ میں صفر پر آؤٹ ہوئے۔

(جاری ہے)

اگلے دن اخبار نے لکھا کہ وہ ''بطخ کے انڈے پر سوار ہو کر'' پویلین لوٹ گئے۔ یہ جملہ اتنا مقبول ہوا کہ اس کے بعد ہر اخبار میں یہی اصطلاح استعمال ہونے لگی اور تب سے کرکٹ میں ’ڈک‘ لفظ عام ہوگیا۔

ہم سب یہ توجانتے ہیں کہ کرکٹ میں اگر بیٹر بغیر رن بنائے صفر پر آؤٹ ہوجائے تو اسے ڈک یعنی انڈے پر آؤٹ ہونا کہا جاتا ہے لیکن اگر کوئی بیٹر اپنی پہلی ہی گیند پر صفر پر آؤٹ ہوجائے تو اسے گولڈن ڈک کہا جاتا ہے۔اس کے علاوہ ڈائمنڈ ڈک کی اصطلاح اس وقت استعمال ہوگی جب کوئی بیٹر بغیر گیند کھیلے ہی صفر پر آؤٹ ہو جائے۔یہ زیادہ تر نان اسٹرائیکر اینڈ پر رن آؤٹ ہونے کی صورت میں ہوتا ہے، یا کبھی وائیڈ گیند پر اسٹرائیکر اینڈ پر اسٹمپ ہونے کی صورت میں بھی ڈائمنڈ ڈک شمار کیا جاتا ہے۔

واضح رہے کہ ون ڈے کرکٹ میں سب سے زیادہ بار صفر پر آؤٹ ہونے کا منفرد ریکارڈ سری لنکا کے سابق کرکٹر سنتھ جے سوریا کے پاس ہے جو 34 بار صفر پر آؤٹ ہوئے۔اس فہرست میں دوسرا نمبر پاکستان کے سابق کپتان شاہد آفریدی کا ہے جو ون ڈے کرکٹ میں 30 بار بغیر کوئی رن بنائے آؤٹ ہوئے۔