ساہیوال ٹیم نے پنجاب کبڈی چیمپئن شپ 2025 کا تاج اپنے نام کرلیا

ہفتہ 27 ستمبر 2025 21:25

حجرہ شاہ مقیم (اُردو پوائنٹ اخبارتازہ ترین - آن لائن۔ 27 ستمبر2025ء) جناح اسٹیڈیم میں پنجاب کبڈی چیمپئن شپ 2025 کے سنسنی خیز مقابلوں کا انعقاد کیا گیا جس میں پنجاب بھر کی تمام ڈویژنز کی نمایاں کبڈی ٹیموں نے حصہ لیا۔ ایونٹ کے دوران پنجاب بھر سے آنے والے شائقین کی بڑی تعداد اسٹیڈیم میں موجود رہی اور کھلاڑیوں کو خوب داد دی۔ فائنل مقابلہ ساہیوال اور فیصل آباد کی ٹیموں کے درمیان کھیلا گیا جو انتہائی کانٹے دار ثابت ہوا تاہم ساہیوال کی ٹیم نے شاندار کھیل پیش کرتے ہوئے 57 پوائنٹس کے ساتھ ٹورنامنٹ جیت لیا۔

اختتامی تقریب میں مہمان خصوصی ممبر قومی اسمبلی چوہدری ریاض الحق جج اور ایم پی اے و صدر پنجاب کبڈی ایسوسی ایشن چوہدری افتخار حسین چھچھر نے شریک ہو کر جیتنے والی ٹیم اور رنر اپ ٹیم میں ٹرافیاں اور انعامات تقسیم کیے۔

(جاری ہے)

اس موقع پر ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ڈی پی او راشد ہدایت اور اسسٹنٹ کمشنر چوہدری رب نواز بھی بطور مہمان اعزاز شریک ہوئے۔

ایم این اے چوہدری ریاض الحق جج نے تقریب سے خطاب کرتے ہوئے کہا کہ وزیراعلیٰ پنجاب مریم نواز شریف کی قیادت میں کھیلوں کے فروغ کے لیے انقلابی اقدامات کیے جا رہے ہیں جبکہ کبڈی ہمارے روایتی اور ثقافتی کھیلوں میں کلیدی حیثیت رکھتی ہے۔ ایم پی اے و صدر کبڈی ایسوسی ایشن پنجاب چوہدری افتخار حسین چھچھر نے کہا کہ کبڈی ایسوسی ایشن صوبے بھر میں کبڈی کے فروغ اور ترقی کے لیے پرعزم ہے اور بہترین کھلاڑیوں کو نیشنل و انٹرنیشنل مقابلوں میں اپنی صلاحیتیں دکھانے کے مواقع فراہم کیے جائیں گے۔