حکومت آزادکشمیر عوام کو سستا آٹا مہیا کرنے میں ناکام،ٍبیرسٹرافتخارگیلانی

غریب عوام کی آٹے کے حصول کیلئے لائنیں لگ گئی،،وزیراعظم آزادکشمیر نیند سے بیدار ہوں،سیکرٹری اطلاعات (ن)لیگ

اتوار 26 مارچ 2023 15:35

مظفرآباد (اُردو پوائنٹ اخبارتازہ ترین - این این آئی۔ 26 مارچ2023ء) سابق وزیر تعلیم سکولز ومرکزی سیکرٹری اطلاعات مسلم لیگ ن آزادکشمیر بیرسٹر افتخار گیلانی نے کہا ہے کہ حکومت آزادکشمیر عوام کو سستا آٹا مہیا کرنے میں ناکام،ٍغریب عوام کی آٹے کے حصول کے لئے لائنیں لگ گئی،رمضان شریف میں عوام شدید مشکلات سے دوچار ہیں،وزیراعظم آزادکشمیر نیند سے بیدار ہوں ۔

گزشتہ روز میڈیا سے بات چیت کرتے ہوئے انھوں نے کہا کہ آزادکشمیر کے اندر حکومت نام کی کوئی چیز نہیں متعدد محکمہ جات میں ملازمین تنخواہ کے لئے سراپا احتجاج ہیں ماہ رمضان میں ملازمین کے گھروں کے چولہے بج چکے ہیں ،غریب عوام پانی کے گھونٹ سے روزہ رکھنے اور افطار کرنے پر مجبور ہو چکے ہیں تحریک انصاف کی حکومت نے رزق کی خوشبو بھی غریب عوام سے دور کر دی۔

(جاری ہے)

انھوں نے کہا کہ حکومت آزادکشمیر جلد عوامی مسائل پر اپنے توجہ مرکوز کرے اگر ایسا نا کیا گیا تو ہم حکومت آزادکشمیر کا بسترا گول کر کے نااہل حکمرانوں کو گھر کا راستہ دکھائیں گے۔انھوں نے کہا کہ مسلم لیگ ن عوامی مسائل سے بخوبی واقف ہے عوام صبر وتحمل سے کام لیں ان شاء اللہ عوام کش حکومت کو جلد چلتا کریں گے اور آزاد جموں وکشمیر کے اندر صدر جماعت شاہ غلام قادر کی قیادت میں مسلم لیگ ن حکومت بنا کر عوامی راج کو دوبارہ بحال کرے گی ماہ رمضان کے مقدس ماہ میں بھی حکومت آزادکشمیر کے وزراء اپنی موج مستیاں کرنے میں مصروف ہیں جبکہ عوام کو آٹا ودیگر اشیاء خوردونوش میسر نہیں ہیں۔