امریکی ماڈل جی جی حدید ورون دھون کے دفاع میں بول پڑیں

میرا بالی ووڈ انداز میں سٹیج پر انٹری دینے کا خواب ورون دھون نے پورا کیا ، سب میری مرضی کے مطابق ہوا خوش ہوں،امریکی ماڈل

پیر 3 اپریل 2023 17:05

ممبئی(اُردو پوائنٹ اخبارتازہ ترین - این این آئی۔ 03 اپریل2023ء) عالمی شہرت یافتہ امریکی ماڈل جی جی حدید بھارتی اداکار ورون دھون کے دفاع میں سامنے آگئیں۔گزشتہ روز سوشل میڈیا پر جی جی حدید اور بھارتی اداکار ورون دھون کی ایک ڈانس پرفارمنس کی ویڈیو وائرل ہوئی تھی۔اس ویڈیو میں ورون دھون حال ہی میں نیتا مکیش امبانی کلچرل سینٹر میں منعقد تقریب کے دوران امریکی ماڈل کے ساتھ رقص کرتے نظر آئے جس میں انہوں نے پرفارمنس کے دوران جی جی کو گود میں اٹھا لیا۔

(جاری ہے)

سوشل میڈیا پر صارفین نے اس پر ناراضگی کا اظہار کیا اور ورون دھون کو تنقید کا نشانہ بناتے ہوئے کہا کہ ورون کو ماڈل کو اٹھانے سے قبل ان کی اجازت لینی چاہئے تھے، تاہم جی جی حدید نے سوشل میڈیا پر ورون دھون کے دفاع میں بولتے ہوئے کہا ہے کہ یہ سب ان کی مرضی کے مطابق ہوا اور وہ خوش ہیں کیونکہ یہ ان کا بالی ووڈ انداز میں اسٹیج پر انٹری دینے کا خواب تھا جو ورون دھون نے پورا کیا ہے۔وائرل ویڈیو میں یہ بھی دیکھا جا سکتا ہے کہ جی جی حدید نے سنہری اور سفید رنگ کی ساڑھی بھی زیب تن کر رکھی تھی جو پرفارمنس کے تھیم کا حصہ بھی ہے۔