جے آئی ٹی کو بیرون ممالک سے تحقیقات کے لیے 3 ہفتے مزید دیے جاتے ہیں، سپریم کورٹ کا حکم نامہ

ارشد شریف کیس تحقیقات پر عدالت کو مطمئن نہ کیا گیا تو جوڈیشل کمیشن بنایا جائے گا، عدالت عظمیٰ کا تحریر ی فیصلہ

بدھ 5 اپریل 2023 17:17

جے آئی ٹی کو بیرون ممالک سے تحقیقات کے لیے 3 ہفتے مزید دیے جاتے ہیں، ..

اسلام آباد (اُردو پوائنٹ اخبارتازہ ترین - این این آئی۔ 05 اپریل2023ء) سپریم کورٹ نے ارشد شریف از خود نوٹس کیس کی 17 مارچ کی سماعت کا تحریری حکم نامہ جاری کر تے ہوئے کہا ہے کہ جے آئی ٹی کو بیرون ممالک سے تحقیقات کے لیے 3 ہفتے مزید دیے جاتے ہیں۔ بدھ کو سپریم کورٹ نے حکم نامے میں کہا کہ ارشد شریف کیس تحقیقات پر عدالت کو مطمئن نہ کیا گیا تو جوڈیشل کمیشن بنایا جائے گا، ان کی فیملی کے وکیل شوکت عزیز صدیقی نے عدالتی کارروائی پراعتراض اٹھایا۔

شوکت صدیقی کے مطابق سپریم کورٹ جے آئی ٹی کی تحقیقات کی نگرانی نہیں کر سکتی، سپریم کورٹ بنیادی حقوق سے متعلق معاملات کی نگرانی اور تحقیقات کرا سکتی ہے۔حکم نامے میں کہا گیا کہ ایڈیشنل اٹارنی جنرل نے کینیا اور یو اے ای سے باہمی قانونی معاونت سے آگاہ کیا، ایڈیشنل اٹارنی جنرل کے مطابق کینین حکام نے تاحال باہمی قانونی معاونت کا جواب نہیں دیا۔

(جاری ہے)

سپریم کورٹ نے کہا کہ خصوصی جے آئی ٹی کو بیرون ممالک سے تحقیقات کے لیے 3 ہفتے مزید دئیے جاتے ہیں، اہم بنیادی حقوق کا معاملہ ہونے کے باعث عدالت تحقیقات کیلئے جوڈیشل کمیشن بناسکتی ہے۔حکم نامے نے کہا کہ ارشد شریف قتل ایک بڑے صحافی کے قتل کے علاوہ بنیادی حقوق کا معاملہ ہے، ان کے قتل کی تحقیقات کیلئے سپریم کورٹ کو 5 ہزار سے زائد خطوط لکھے گئے، سپریم کورٹ ارشد شریف قتل کی صاف اور شفاف تحقیقات کرانا چاہتی ہے، کیس کی مزید سماعت اپریل کے مہینے میں ہو گی۔