آئیفا ایوارڈ میں مسلسل تیسری بارپاکستانی آرٹسٹ نبیلا کریں گی بولی ووڈ فنکاروں کے حسن میں اضافہ

ہفتہ 27 مئی 2023 17:34

ابوظہبی (اُردو پوائنٹ اخبارتازہ ترین - این این آئی۔ 27 مئی2023ء) مسلسل تیسری بار پاکستانی بیوٹی سیلون نبیلاز آئیفا ایوارڈز کی تقریب میں آفیشل ہیئر اسٹائلنگ اور میک اپ پارٹنر بن گئی ہیں۔ابو ظہبی کے یاس آئی لینڈ کے اتحاد ارینا میں ہونے والے آئیفا ایوارڈ کی تقریب 27 مئی کو ہوگی جہاں بولی ووڈ کے چمکتے ستار اپنے جلوے بکھیرے گیں۔گزشتہ روز اسی حوالے سے ایک پریس کانفرنس بھی منعقد کی گئی جس میں سلمان خان ، فرح خان ، نورہ فتحیٰ، ویکی کوشال، کترینہ کیف، ابھیشک بچچن سمیت بین الاقوامی ڈانس گروپ کوئیک اسٹائل نے بھی شرکت کی۔

پریس کانفرنس میں اعلان کیا گیا کہ بولی ووڈ کے سب سے بڑے ایوارڈ شو کی تقریب میں بولی ووڈ شخصیات کے میک اپ اور ہیر اسٹائلنگ کی ذمہ داری پاکستان کی معروف میک اپ آرٹسٹ نبیلا مقصود کے سیلون کی ہوگی۔

(جاری ہے)

نبیلا سیلون کے آفیشل انسٹاگرام پر آئیفا پریس کانفرنس کی ایک ویڈیو بھی شئیر کی گئی، جہاں نبیلا کو ان کی خدمات کے اعزاز میں آئیفا شیلڈ وصول کرنے کے لیے اسٹیج پر بلایا گیا۔

ویڈیو میں دیکھا جاسکتا ہے کہ اسٹیج پر نبیلا کے ساتھ فرح خان، راجکمار راؤ اور دیگر موجود ہیں۔اس بار نبیلا کو بیک اسٹیج پر ماسٹر کلاس کی پیشکش بھی کی گئی جہاں نبیلا نے یہ پیشکش ملنے پر خوشی کا اظہار کیا۔ایک ویڈیو میں نبیلا نے کہا کہ وہ اس پیشے سے کئی سالوں سے وابستہ ہیں۔انہوں نے کہا کہ اب ہمیں ایسا محسوس ہورہا ہے کہ ہم آئیفا فیملی کا حصہ ہیں، ہم مسلسل تیسری بار اس پلیٹ فارم کا حصہ ہیں جس پر ہمیں خوشی ہے، آئیفا ایک بہترین پلیٹ فارم ہے، تین دن کے لیے میرے سیلون کا پورا اسٹاف یہاں موجود ہے۔

نبیلا اور ان کی ٹیم نے 2018 میں آئیفا ایوارڈز کی تقریب میں پہلی بار شرکت کی تھی اور پھر 2022 میں آئیفا نے نبیلا اور ان کی ٹیم کو ایک بار پھر ذمہ داری سونپی۔2023 میں بھی بولی ووڈ فنکاروں کے حسن کو سنوارنے کے لیے ’نبیلا‘ کا ہی انتخاب کیا گیا ہے۔نبیلا اپنے زیرو میک اپ برانڈ اور میک اپ کی دنیا میں ایک منفرد مقام حاصل ہے،وہ اپنے میک اپ کے جادو سے بولی ووڈ حسیناؤں کے حسن کو نکھاریں گیں۔تین دہائیوں سے زائد عرصے کے تجربے کے ساتھ وہ پاکستان کی نامور شخصیات کے حسن کو بھی سنوارتی ہیں۔