چینی صدر کی سابق امریکی سیکریٹری آف اسٹیت ہنری کسنجر سے ملاقات

ي*بیجینگ(اُردو پوائنٹ اخبارتازہ ترین - آن لائن۔ 20 جولائی2023ء) چین کے صدر شی جن پنگ نے سابق امریکی سیکریٹری آف اسٹیت ہنری کسنجر سے بیجنگ میں ملاقات کی اور انہیں ایک ’پرانا دوست‘ قرار دیا۔ غیر ملکی خبر رساںادارے کے مطابق ہنری کسنجر اس ہفتے چین کے دورے پر ہیں جہاں وہ امریکا اور چین کے درمیان تعلقات کی بحالی کا مطالبہ کرتے رہے ہیں حالانکہ دونوں ملکوں کے درمیان انسانی حقوق سے لے کر تجارت اور قومی سلامتی کے امور پر کئی معاملات پر تعلقات اکثر کشیدہ رہتے ہیں لیکن حال ہی میں امریکا کی جانب سے چین سے تعلقات کی بحالی کے لیے کئی سرگرم کوششیں کی گئی ہیں۔

100 سالہ سفارت کار نے 1970 کی دہائی میں چین کے امریکا کے ساتھ تعلقات کے قیام میں اہم کردار ادا کیا تھا اور انہوں نے کئی سالوں سے چین کے رہنماؤں کے ساتھ قریبی روابط برقرار رکھے۔

(جاری ہے)

صدر شی جن پنگ نے ہنری کسنجر سے ملاقات کے دوران کہا کہ چینی عوام دوستی کی قدر کرتے ہیں، اور ہم اپنے پرانے دوست اور چین امریکا تعلقات کو فروغ دینے اور چینی اور امریکی عوام کے درمیان دوستی کو بڑھانے کے حوالے سے آپ کے تاریخی کردار کو کبھی فراموش نہیں کریں گے۔

انہوں نے مزید کہا کہ اس سے ناصرف دونوں ممالک کو فائدہ ہوا بلکہ اس نے دنیا کو بھی بدل کر رکھ دیا۔چینی رہنما نے کہا کہ دنیا اس وقت ایسی تبدیلیوں کا سامنا کر رہی ہے جو ایک صدی میں نہیں دیکھی گئیں اور بین الاقوامی نظام بہت زیادہ تبدیلیوں کے عمل سے گزر رہا ہے۔چینی صدر نے کہا کہ چین اور امریکا ایک بار پھر ایسے موڑ پر ہیں جہاں دونوں فریقین کو ایک بار پھر انتخاب کرنا ہوگا۔

ہنری کسنجر نے کہا کہ دونوں ممالک کے تعلقات دنیا میں امن اور ہمارے معاشروں کی ترقی کے لیے مرکزی کردار ادا کریں گے۔ہنری کسنجر 1971 میں کمیونسٹ چین کے ساتھ تعلقات قائم کرنے کے مشن پر خفیہ طور پر بیجنگ گئے تھے۔ان کے اس خفیہ دورے نے سابق امریکی صدر رچرڈ نکسن کے چین کے تاریخی دورے کی راہ ہموار کی تھی جہاں اس وقت کے امریکی صدر ویتنام جنگ کے خاتمے کے لیے چین کے تعاون کے خواہاں تھے۔

اس جواب میں امریکا نے چین کی مدد کی اور چین کو مینوفیکچرنگ پاور ہاؤس اور دنیا کی دوسری سب سے بڑی معیشت بننے میں اہم کردار ادا کیا تھا۔عہدہ چھوڑنے کے بعد سے امن کا نوبیل انعام جیتنے والے ہنری کسنجر نے چین کے بارے میں کاروباری مشورے دے کر بے پناہ دولت کمائی اور ساتھ ساتھ امریکا کو خبردار بھی کرتے رہے ہیں وہ چین کے حوالے سے کوئی بھی اقدام یا فیصلہ جلد بازی میں لینے سے باز رہے۔انہوں یہ دورہ ایک ایسے موقع پر کیا ہے جب امریکا کے موسمیاتی ایلچی جان کیری بھی چین کے دورے پر ہیں جبکہ اس سے قبل وزیر خزانہ جینٹ ییلن اور سیکریٹری آف اسٹیٹ انٹونی بلنکن نے بھی حال ہی میں چین کے دورے کیے تھے۔۔