قائداعظم ٹرافی،عابدعلی کے ناقابل شکست 164 رنز۔ غلام مدثر کی پانچ وکٹیں

پیر 25 ستمبر 2023 20:10

لاہور(اُردو پوائنٹ اخبارتازہ ترین - این این آئی۔ 25 ستمبر2023ء) قائداعظم ٹرافی کرکٹ ٹورنامنٹ میں پیر کے روز مکمل ہونے والے تینوں میچ نتیجہ خیز ثابت نہ ہوسکے اور ڈرا ہوگئے،آخری دن کے کھیل کی خاص بات لاہور ریجن وائٹس کے عابدعلی کی ناقابل شکست سنچری تھی جو ان کی 27 ویں فرسٹ کلاس سنچری ہے۔قذافی اسٹیڈیم لاہور میں ملتان ریجن اور لاہور ریجن وائٹس کے درمیان میچ کے چوتھے اور آخری دن ملتان نے اپنی پہلی اننگز میں329 رنز چھ کھلاڑی آؤٹ پر شروع کی اور346 رنز سات کھلاڑی آؤٹ پر ڈکلیئر کردی جس میں زین عباس 94 شیرون سراج 64 اور ہمایوں الطاف 60 رنز کے ساتھ نمایاں رہے تھے۔

جواب میں لاہور ریجن وائٹس نی78 اوورز کی بیٹنگ میں304 رنز بنائے تھے اور اس کے 6 کھلاڑی آؤٹ ہوئے تھے۔عابدعلی نے شاندار بیٹنگ کرتے ہوئی21 چوکوں اور ایک چھکے کی مدد سے 164رنز بنائے اور نا ٹ آؤٹ رہے۔

(جاری ہے)

ملتان کے وکٹ کیپر حسیب اللہ نے چار کیچز لیے۔اس میچ میں زیادہ تر کھیل بارش کی وجہ سے متاثر ہوا۔ دوسرے دن ایک گیند بھی نہیں کرائی جاسکی تھی جبکہ تیسرے دن صرف 32 اوورز ہوسکے تھے۔

پنڈی کرکٹ اسٹیڈیم میں فیصل آباد ریجن اور لاہور ریجن بلوز کے درمیان میچ بھی ڈرا ہوگیا۔آخری دن فیصل آباد نے اپنی دوسری اننگز 34 رنز 2 کھلاڑی آؤٹ پر شروع کی اور 7 وکٹوں کے نقصان پر188 رنز بنائے۔محمد حریرہ 39۔محمد عرفان خان39 اور فہیم اشرف34 رنز کے ساتھ نمایاں رہے۔اس سے قبل لاہور بلوز نے اپنی پہلی اننگز میں 201 جبکہ فیصل آباد نے اپنی پہلی اننگز میں211 رنز بنائے تھے۔

شعیب اختر اسٹیڈیم راولپنڈی میں کراچی وائٹس اور فاٹا کے درمیان میچ ڈرا ہوگیا۔ میچ کے آخری دن فاٹا نے اپنی پہلی اننگز میں110 رنز 6 کھلاڑی آؤٹ پر شروع کی اور پوری ٹیم 184 رنز بناکر آؤٹ ہوگئی اسطرح اسے کراچی ریجن وائٹس پر پہلی اننگز کی40 رنز کی سبقت حاصل ہوگئی۔محمد سرور نی70 رنز کی اننگز کھیلی۔ غلام مدثر نی44 رنز دے کر5 وکٹیں حاصل کیں۔میرحمزہ نے تین کھلاڑیوں کو آؤٹ کیا۔کراچی ریجن وائٹس نے کھیل کے اختتام پر دوسری اننگز میں بغیر کسی نقصان کے ایک رن بنایا تھا۔