گورنر پنجاب ،وزیر صحت کی زیر قیادت ذیابیطس کے عالمی دن کی مناسبت سے آگاہی ریلی ،تقریب کا انعقاد

پاکستان میں ذیابیطس کا ڈیزیز برڈن بہت حد تک بڑھ چکا ہے،ہمیں صحت مند طرز زندگی اپنانا ہوگا‘بلیغ الرحمن کا خطاب عوام میں ذیابیطس بارے آگاہی پھیلانے کی اشد ضرورت ہے، پاکستان میں ساڑھے پانچ لاکھ ڈائیلسز مشینیں درکار ہیں ‘جاوید اکرم

منگل 14 نومبر 2023 17:23

گورنر پنجاب ،وزیر صحت کی زیر قیادت ذیابیطس کے عالمی دن کی مناسبت سے ..

لاہور (اُردو پوائنٹ اخبارتازہ ترین - این این آئی۔ 14 نومبر2023ء) گورنر پنجاب محمد بلیغ الرحمن اور نگران صوبائی وزیر صحت پروفیسر ڈاکٹر جاوید اکرم کی زیر قیادت الحمراء ہال سے گورنر ہاؤس تک ذیابیطس کے عالمی دن کی مناسبت سے آگاہی ریلی اور تقریب کا انعقادکیاگیا۔آگاہی تقریب میں وائس چانسلر فاطمہ جناح میڈیکل یونیورسٹی پروفیسر ڈاکٹر خالد مسعود گوندل، پرنسپل امیر الدین میڈیکل کالج پروفیسر ڈاکٹر سردار ظفر الفرید، پروفیسر آفتاب محسن، پروفیسر طارق، ڈاکٹر عباس رضا، ڈاکٹر صومیہ اقتدار اور خواتین و حضرات کی کثیر تعداد نے شرکت کی۔

گورنر پنجاب محمد بلیغ الرحمن اور نگران صوبائی وزیر صحت ڈاکٹر جاوید اکرم نے گورنر ہاؤس کے اندر مختلف آگاہی سٹالز کا دورہ بھی کیا۔

(جاری ہے)

آگاہی تقریب کے دوران دو سو سے زائد شرکاء کے شوگر ٹیسٹ کئے گئے اور ادویات فراہم کی گئیں۔گورنر پنجاب محمد بلیغ الرحمن نے تقریب کے شرکاء سے اپنے خطاب میں کہاکہ ذیابیطس کو ام الامراض کہا جاتا ہے۔پاکستان میں ذیابیطس کا ڈیزیز برڈن بہت حد تک بڑھ چکا ہے۔

گورنر پنجاب نے کہاکہ ذیابیطس پر قابو نہ پانے کی وجہ سے بینائی اور گردے متاثر ہو جاتے ہیں۔ ذیابیطس سے بچنے کیلئے ہمیں صحت مند طرز زندگی اپنانا ہوگا۔ نگران صوبائی وزیر صحت پروفیسر ڈاکٹر جاوید اکرم نے تقریب کے شرکاء سے اپنے خطاب میں کہاکہ گورنر پنجاب محمد بلیغ الرحمن ذیابیطس کے خلاف جنگ میں ہمارے کمانڈر ان چیف ہیں۔گورنر پنجاب محمد بلیغ الرحمن کی قیادت میں پاکستان سوسائٹی آف انٹرنل میڈیسن اور پاکستان سوسائٹی آف انڈوکرونولوجی ذیابیطس کے خلاف جنگ جاری رکھیں گی۔

پروفیسر ڈاکٹر جاوید اکرم نے کہاکہ عوام میں ذیابیطس بارے آگاہی پھیلانے کی اشد ضرورت ہے۔ پاکستان میں ساڑھے پانچ لاکھ ڈائیلسز مشینیں درکار ہیں جبکہ اس وقت پاکستان میں صرف پچاسی ہزار ڈائیلسز مشینیں موجود ہیں۔ صوبائی وزیرصحت ڈاکٹر جاوید اکرم نے کہاکہ ذیابیطس کے حوالے سے پاکستان دنیا کا سب سے بڑا ملک ثابت ہو رہا ہے۔ اللہ پاک نے حضرت محمد صلی اللہ علیہ وآلہ وسلم کو رحمة للعالمین بنا کر بھیجا۔ نبی کریم صلی اللہ علیہ وآلہ وسلم سے بہتر کسی کا لائف سٹائل نہیں ہو سکتا۔ پروفیسر ڈاکٹر جاوید اکرم نے کہاکہ بچے موبائلز پر نہیں گراؤنڈ میں جا کر گیمز کھیلیں۔ بچوں کو فاسٹ فوڈ سے بچانا چاہئے۔