الحمراء میں فیسٹیول ’’لہور لہور اے ‘‘میں تھیٹر ڈرامہ ’’روشنائی ‘‘ پیش

ہفتہ 18 نومبر 2023 13:34

لاہور (اُردو پوائنٹ اخبارتازہ ترین - این این آئی۔ 18 نومبر2023ء) لاہور آرٹس کونسل الحمراء میں فیسٹیول لہور لہور اے میں تھیٹر ڈرامہ ’’روشنائی ‘‘ پیش کیا گیا۔کالج آف آرٹ اینڈ ڈیزائن، پنجاب یونیورسٹی کے طلبا و طالبات کی سوسائٹی کے آرٹسٹوں نے ڈرامہ میں پرفارم کیا۔ ڈرامہ پروفیسر احمد بلا ل نے تحریر کیا تھا۔ روشنائی ایک ایکٹ کا کھیل ہے جو ایک مقامی فن کار آرٹسٹ کی زندگی پر مبنی ہے۔

کیپیٹل ازم کے اس دور میں ہم جیسے معاشرے میں روائیت اور جدت کے درمیان پیدا ہونے والے خلا میں مقامی آرٹسٹ اپنی لئے کوئی راستہ تلاش نہیں کر پاتا کیونکہ اس کے ارد گرد اس کے آرٹ اور اس کی مشکلات کو سمجھنے والے لوگوں کا قحط پایا جاتا ہے۔زیادہ سے زیادہ ہم جیسے معاشروں میں آرٹ یا فن کو کمائی کا ذریعہ سمجھا جاتا ہے لیکن آرٹ معاشرے کی اجتماعی شکل کا آئینہ دار بھی ہوتا ہے اور اسی لئے بڑے معاشرے اپنے فنون اور فنکار ترقی کے مواقع فراہم کرنا اپنی ذمہ داری سمجھتے ہیں، جبکہ ہم اپنے آرٹ یا آرٹسٹ کو بچانے کی کوئی سنجیدہ کاوش کرتے نظر نہیں آتے۔

(جاری ہے)

اسی تناظر میں روشنائی طنز و مزاح پہ مبنی ایک سماجی کھیل ہے جس کے نمایاں اداکاروں میں میاں احمد، اسامہ بٹ، انوش خان، فیضان نیا زی، ارویٰ، فاھا، شامل ہیں۔ کھیل کی ڈائیریکشن اسامہ بٹ اور میاں احمد نے کی ہے۔عوام کی بڑی تعداد الحمراء کے تھیٹر فیسٹیول کو دیکھنے کے لئے آر ہی ہے۔