وزڈن کی طرف سے ورلڈ کپ کی پانچ بہترین اننگز میں فخر زمان کی اننگز بھی شامل

آسٹریلیا کے گلین میکسویل کی افغانستان کے خلاف 128 بالوں پر 201 رنز کی اننگز ٹورنامنٹ کی سب سے بہترین اننگ قرار

پیر 20 نومبر 2023 22:47

لندن (اُردو پوائنٹ اخبارتازہ ترین - اے پی پی۔ 20 نومبر2023ء) وزڈن کی طرف سے ورلڈ کپ 2023ء کی پانچ بہترین اننگز میں فخر زمان کی اننگز کو بھی شامل کرلیا گیا۔ بھارت میں منعقدہ ورلڈ کپ شاندار مقابلوں کے بعد اختتام پذیر ہوگیا، میگا ایونٹ کے 48 میچوں میں مجموعی طور پر 40 سنچریاں سکور ہوئیں، کسی میچ میں دو،کسی میں تین اور حتی کہ کسی ایک میچ میں چار سنچریاں بھی سکور ہوئیں۔

وزڈن کی طرف سے جاری کردہ ورلڈ کپ کی پانچ بہترین اننگز کی فہرست میں آسٹریلیا کے گلین میکسویل کی افغانستان کے خلاف 128 بالوں پر 201 رنز کی اننگز پہلے نمبر پر ہے۔ افغانستان کے خلاف میچ میں 292 رنز کے ہدف کے تعاقب میں آسٹریلیا کے 97 کے سکور پر 7 کھلاڑی آئوٹ ہو چکے تھے اور کینگروز کی شکست یقینی نظر آرہی تھی تاہم میکسویل نے اس میچ میں تن تنہا اپنی ٹیم کو فتح دلائی۔

(جاری ہے)

ورلڈ کپ فائنل میں بھارت کے خلاف آسٹریلیا کے ٹریوس ہیڈ کی 120 بالوں پر 137 رنز کی اننگز کو بہترین اننگز میں دوسرے نمبر پر رکھا گیا ہے۔ سیمی فائنل میں آسٹریلا کے خلاف جنوبی افریقی مڈل آرڈر بلے باز ڈیوڈ ملر کی شاندار سنچری کو بھی بہترین اننگز کی فہرست میں شامل کیا گیا ہے۔ جنوبی افریقہ کے 24 رنز پر 4 کھلاڑی آئوٹ ہوئے تو ملر نے نمبر 6 پر بیٹنگ کرتے ہوئے اپنی ٹیم کو مشکلات سے نکالا اور مجموعی سکور کو 212 تک پہنچا یا تھا، پاکستان کے اوپننگ بلے باز فخر زمان کی نیوزی لینڈ کے خلاف 81 بالوں پر 126 رنز کی ناٹ آئوٹ اننگز کو بھی بہترین اننگز میں شمار کیا گیا ہے۔

نیوزی لینڈ کے خلاف 402 رنز کے ہدف کے تعاقب میں فخر زمان نے جارحانہ بیٹنگ کرتے ہوئے 63 بالوں پر سنچری سکور کی تھی، افغانستان کے رحمان اللہ گرباز کی انگلینڈ کے خلاف 57 بالوں پر 80 رنز کی اننگز کو ورلڈ کپ کی پانچویں بہترین اننگز میں شامل کیا گیا ہے۔ گرباز کی شاندار بیٹنگ کی بدولت افغانستان نے پہلی بار انگلینڈ کو ورلڈ کپ میچ میں شکست دی تھی۔