Live Updates

پارٹی منشور کی تیاری میں عوام کو مہنگائی سے نجات دلانے پر خصوصی توجہ دی جا رہی ہے ،مریم اورنگزیب

منگل 28 نومبر 2023 11:56

اسلام آباد (اُردو پوائنٹ اخبارتازہ ترین - اے پی پی۔ 28 نومبر2023ء) مسلم لیگ (ن) کی مرکزی سیکرٹری اطلاعات مریم اورنگزیب نے کہا ہے کہ آئندہ عام انتخابات کے لئے پارٹی کا انتخابی منشور ہمیشہ کی طرح جامع ، قابل عمل اور ملک کے مسائل کاحل ثابت ہو گا۔ منگل کو اپنے بیان میں انہوں نے کہا کہ مسلم لیگ (ن)نے اپنی روایت کے مطابق معاشی بحالی وخود انحصاری اور عوام کو مہنگائی سے نجات دلانے پر خصوصی توجہ دی جا رہی ہے، منشور تیاری کے آخری مراحل میں ہے۔

انہوں نے کہا کہ صرف وعدے نہیں کرنے اپنی روایت اور تاریخ کے مطابق وعدے، منصوبے اور ترقی کے اہداف حاصل کرنے کا پلان دیں گے۔مسلم لیگ (ن) کا منشور تمام طبقات اور ماہرین کی تجاویز کی روشنی میں تیار کیا جا رہا ہے۔آئینی کی بالادستی، قانون کی حکمرانی کے لئے اصلاحات، انتظامی امور میں بہتری، گڈ گورننس پر سفارشات مرتب کی جا رہی ہیں۔

(جاری ہے)

انہوں نے کہا کہ نظام عدل کی اصلاح اولین ہدف ہے تاکہ شہریوں کے حقوق، سستے اور فوری انصاف کی فراہمی یقینی ہو۔

خارجہ تعلقات کا فروغ، امن کا قیام، قومی دفاع کو مزید مضبوط بنانا منشور کے اہم نکات میں شامل ہیں۔ بیوروکریسی، سول سروسز اور امور سرکار کو شفاف، فعال اور آسان بنانے کی تجاویز مرتب کی جا رہی ہیں۔ مریم اورنگزیب نے کہا کہ ایندھن، ٹرانسپورٹ کے مسائل کا حل، وفاق اور صوبوں کے درمیان وسائل کی منصفانہ تقسیم پر بھی منشور میں سفارشات شامل ہوں گی۔

میڈیا، فلم، ٹی وی، تاریخ و ادب، ثقافت، سیاحت کے فروغ کےلئے پالیسی گائیڈ لائن منشور میں شامل ہو گی ۔ موسمیاتی تبدیلیوں، بڑھتی آبادی پر قابو، صحت و غذا کا تحفظ منشور کے نکات میں شامل ہیں۔ انہوں نے کہا کہ نوجوانوں کی تعلیم، وظائف اور لیپ ٹاپ کی فراہمی، ہنرمندی اور روزگار کے لئے فوری قابل عمل تجاویز تیار کی جا رہی ہیں۔ کسانوں، محنت کشوں، مزدوروں، کمزور طبقات اور اقلیتوں کے معاشی، سماجی حقوق کے تحفظ کے لئے ٹھوس پالیسیاں منشور میں شامل ہوں گی۔

کھیلوں کا فروغ، نئے میدانوں اور سپورٹس کمپلیکسز کی تیاری، خصوصی افراد کے لئے اقدامات بھی منشور کا حصہ ہوں گے۔ انہوں نے کہا کہ خواتین اور بچوں کے حقوق کے تحفظ اور فروغ کے لئے پالیسی اقدامات منشور میں شامل ہوں گے، الحمدللہ، مسلم لیگ (ن) نے ہمیشہ وعدے پورے کئے ہیں، پھر کریں گے، مریم اورنگزیب ہمیشہ کی طرح ایک بار پھر عوام کی زندگیوں میں آسانی لائیں گے۔