Live Updates

عمران خان نے مجھے وزیراعلیٰ بنایا، ان کا اعتماد ہے تو میں یہاں بیٹھا ہوں، علی امین گنڈاپور

عمران خان کی حکومت ہے اور ان کا مینڈیٹ ہے، میرے خلاف سب باتیں ہمارے مخالفین کی ہیں؛ وزیراعلیٰ خیبرپختونخواہ کی گفتگو

ساجد علی اتوار 3 اگست 2025 21:30

عمران خان نے مجھے وزیراعلیٰ بنایا، ان کا اعتماد ہے تو میں یہاں بیٹھا ..

پشاور ( اُردو پوائنٹ اخبارتازہ ترین۔ 03 اگست 2025ء ) وزیرِاعلیٰ خیبر پختون خوا علی امن گنڈا پور نے ان دعوؤں کی تردید کر دی ہے کہ عمران خان بیرونِ ملک جانے کو تیار ہو گئے تھے، انہوں نے کہا کہ بانی پی ٹی آئی پاکستان سے باہر نہیں جائیں گے، اگر انہوں نے کوئی ڈیل کرنی ہوتی اب تک کرلی ہوتی، عمران خان نے ہمیشہ کہا ہے پاکستان سے باہر نہیں جاؤں گا، مفروضے بنائے جاتے ہیں، شوشے چھوڑے جاتے ہیں جن کا مقصد تحریک کو نقصان پہنچانا ہے۔

وزیرمملکت حزیفہ رحمان کے دعوے سے متعلق سوال کے جواب میں وزیرِاعلیٰ خیبرپختونخواہ نے کہا کہ عمران خان نے کبھی نہ خواہش ظاہر کی اور نہ سوچا کہ ملک چھوڑ کر جائیں گے، بانی پی ٹی آئی نے مجھے وزیر اعلیٰ بنایا، ان کی حکومت ہے، ان کا مینڈیٹ ہے، عمران خان کا اعتماد ہے تو میں یہاں بیٹھا ہوں، میرے خلاف سب باتیں ہمارے مخالفین کی ہیں، سازشوں کا حصہ بننے والے بانی کے نہیں مخالفین کے ایجنڈے پر ہیں۔

(جاری ہے)

ان کا کہنا ہے کہ مذاکرات سے مسائل کو حل کرنا چاہیئے، آپریشن مسائل کا حل نہیں، پہلے بھی آپریشن کرچکے ہیں لیکن کامیابی نہیں ہوئی، سب سے پہلے ہمیں افغانستان سے تعلقات ٹھیک کرنے پڑیں گے، افغانستان سے تعلقات بہتر ہونا چاہئیں، مذاکرات ہونا چاہئیں، لوگوں کے اعتماد کے بغیر نہ جنگ لڑ سکتے ہیں اور نہ جیت سکتے ہیں، مسائل پر کھل کر بات نہ ہو تو چھوٹا مرض کینسر بن جاتا ہے، لوگوں کا اداروں پر اعتماد بحال ہونا ضروری ہے، حکومت، اداروں اور عوام میں اعتماد نہیں ہو گا تو کامیابی حاصل نہیں کرسکتے، جب تک امن نہیں ہو گا ترقی نہیں ہو سکتی، عوام کے اعتماد کے ساتھ دہشت گردی کا خاتمہ کریں گے۔