وزیر اعلیٰ محسن نقوی سے آغاخان فاؤنڈیشن کے ہیڈ آف ہیرٹیج کی ملاقات

تاریخی عمارتوں کے تحفظ کیلئے وزیر اعلیٰ محسن نقوی کی قیادت میں حکومتی کاوشیں قابل تحسین ہیں‘لوائس منریرل

جمعہ 1 دسمبر 2023 18:28

وزیر اعلیٰ محسن نقوی سے آغاخان فاؤنڈیشن کے ہیڈ آف ہیرٹیج کی ملاقات

لاہور (اُردو پوائنٹ اخبارتازہ ترین - این این آئی۔ 01 دسمبر2023ء) وزیراعلیٰ پنجاب محسن نقوی سے آغاخان فاؤنڈیشن کے ہیڈ آف ہیرٹیج لوائس منریرل نے وزیر اعلیٰ آفس میں ملاقات کی، ملاقات میں تاریخی وقدیم عمارتوں اورمقامات کے تحفظ اوربحالی کیلئے جاری پراجیکٹس پر تبادلہ خیال کیا گیا۔ وزیر اعلیٰ محسن نقوی نے آغا خان فائونڈیشن کے ہیڈ آف ہیرٹیج سے گفتگو کرتے ہوئے کہا کہ پنجاب بھر میں تاریخی عمارتوں اورمقامات کو اصل حالت میں بحال کرنے کیلئے کوشاں ہیں۔

لاہور میں آثارقدیمہ کی بحالی اوربہتری کیلئے آغاخان فاؤنڈیشن کی معاونت قابل تحسین ہیں۔انہوں نے کہا کہ شالامار باغ اورمقبرہ جہانگیر سمیت دیگر تاریخی عمارتوں کو والڈ سٹی اتھارٹی کے ذریعے بحال کیا جارہا ہے۔

(جاری ہے)

ملتان کے قلعہ کہنہ قاسم باغ کو اصل حالت میں بحال کر کے سیاحوں کی توجہ کا مرکز بنائیں گے۔ وزیر اعلیٰ محسن نقوی نے کہا کہ لاہور کے شاہی قلعہ،بادشاہی مسجدا وردیگر مقامات کی بحالی کیلئے دن رات کام جاری ہے۔

نئے تاریخی مقامات دریافت ہونے سے روزگار اورسیاحت کے امکانات بڑھ رہے ہیں۔ چیف سیکرٹری زاہد اختر زمان نے کہا کہ قلعہ درڑاور کے قریب ہزاروں سال پرانے شہر کی دریافت قابل قدر کامیابی ہے۔ آغا خان فائونڈیشن کے ہیرٹیج ہیڈ لوائس منریرل نے وزیر اعلیٰ محسن نقوی سے گفتگو کرتے ہوئے کہا کہ تاریخی عمارتوں کے تحفظ کیلئے حکومت پنجاب کی کاوشیں قابل تحسین ہیں۔

وزیراعلیٰ محسن نقوی قدیمی،تاریخی اورثقافتی مقامات کی بحالی کیلئے پوری طرح یکسو نظر آتے ہیں اور پنجاب میں والڈ سٹی اتھارٹی کا انتظامی تسلسل برقرار رکھنے کے بہتر نتائج برآمد ہوئے۔ چیف سیکرٹری زاہد اختر زمان، آغاخان فاؤنڈیشن پاکستان کے سی ای او خواجہ توصیف اورڈی جی والڈ سٹی اتھارٹی کامران لاشاری بھی اس موقع پر موجود تھے۔