بنگلہ دیش نے پہلے ٹیسٹ میچ میں 150 رنز سے شکست دیکر دو میچوں کی سیریز میں 0-1 کی برتری حاصل کرلی

ہفتہ 2 دسمبر 2023 15:26

سلہٹ(اُردو پوائنٹ اخبارتازہ ترین - این این آئی۔ 02 دسمبر2023ء) بنگلہ دیش نے تیج الاسلام کی شاندار باؤلنگ کی بدولت نیوزی لینڈ کو پہلے ٹیسٹ میچ میں 150 رنز سے شکست دیکر دو میچوں کی سیریز میں 0-1 کی برتری حاصل کر لی ، نیوزی لینڈ کی ٹیم 332 رنز کے ہدف کے تعاقب میں 181 رنز پر ڈھیر ہو گئی ، تیج الاسلام نے 6 کھلاڑیوں کو آؤٹ کیا ۔بنگلہ دیش کی یہ اپنی سر زمین پر نیوزی لینڈ کے خلاف کسی ٹیسٹ میچ میں پہلی فتح ہے ، ہفتہ کو سلہٹ انٹرنیشنل کرکٹ اسٹیڈیم میں ٹیسٹ کے پانچویں اور آخری روز نیوزی لینڈ نے 332 رنز کے ہدف کے تعاقب میں 113 رنز 7 کھلاڑی آؤٹ پر اننگز دوبارہ شروع کی تو ڈیرل مچل 44 اور ایش سودی 7 رنز کے ساتھ وکٹ پر موجود تھے۔

ڈیرل مچل نے اپنی نصف سنچری مکمل کی تاہم وہ زیادہ دیر وکٹ پر نہ ٹھہر سکے اور 58 رنز بنانے کے بعد نعیم حسن کی گیند پر کیچ آؤٹ ہو گئے ، اس کے بعد کپتان ٹم ساؤدی بیٹنگ کے لیے آئے اور انہوں ایش سودی کے ساتھ مل کر ٹیم کا سکور 178 تک پہنچا دیا ، ٹم ساؤدی نویں آئوٹ ہونے والے کھلاڑی تھے جو 34 رنز بنا کر تیج الاسلام کا نشانہ بنے۔

(جاری ہے)

ایش سودی کو بھی تیج الاسلام نے 22 کے انفرادی سکور پر آؤٹ کر کے اپنی ٹیم کو تاریخی کامیابی دلا دی ، نیوزی لینڈ کی ٹیم 181 رنز بنا کر آؤٹ ہو گئی ، بنگلہ دیش کی جانب سے تیج الاسلام نے شاندار باؤلنگ کا مظاہرہ کیا اور 6 وکٹیں حاصل کیں ، انہیں میچ میں مجموعی طور پر 10 وکٹیں حاصل کرنے پر مرد میدان قرار دیا گیا۔