نائجر کا ملک میں یورپی یونین کے سکیورٹی اور دفاعی مشنز کو ختم کرنے کا اعلان

منگل 5 دسمبر 2023 10:30

نیامے (اُردو پوائنٹ اخبارتازہ ترین - اے پی پی۔ 05 دسمبر2023ء) نائجر کی فوجی حکومت نے روس کے ساتھ فوجی تعاون کو مضبوط بنانے پر اتفاق کرنے کے بعد ملک میں یورپی یونین کے سکیورٹی اور دفاعی مشنز کو ختم کرنے کا اعلان کر دیا۔ فرانسیسی خبر رساں ادارے کے مطابق نائجر کی وزارت خارجہ نے گزشتہ روز ایک بیان میں کہا کہ وہ یورپی یونین کے ساتھ نیامے میں شہری صلاحیتوں میں اضافے کے مشن کے حوالے سے معاہدے کو ختم کر رہے ہیں جسے ای یو سی اے پی ساحل نائجر کہا جاتا ہے۔

(جاری ہے)

یہ مشن 2012 میں شروع کیا گیا تھا جو نائجر کی داخلی سکیورٹی فورسز، حکام اور غیر سرکاری اداروں کی مدد کرتا ہے۔وزارت خارجہ نے کہا کہ ملک نے ’’یورپی یونین کے فوجی پارٹنرشپ مشن کی تعیناتی کے لیے ریاست نائیجر کی رضامندی سے دستبرداری‘‘ کا اعلان کیا ہے۔ یورپی کونسل کی ویب سائٹ کے مطابق ای یو ایم پی ایم کے نام سے فوجی شراکت داری نائجر حکام کی درخواست پر فروری میں شروع کی گئی تھی۔ ویب سائٹ میں کہا گیا کہ اسے دہشت گردی کے خطرے پر قابو پانے کے لیے نائجر کی مسلح افواج کی صلاحیت کو بڑھانے کے لیے ڈیزائن کیا گیا تھا۔