اداکارہ فردوس بیگم کو مداحوں سے بچھڑے 3 برس بیت گئے

اداکارہ نے 150 سے زائد فلموں میں کام کیا، فلم ہیر رانجھا نے انہیں شہرت کی بلندیوں پر پہنچایا

ہفتہ 16 دسمبر 2023 13:30

لاہور(اُردو پوائنٹ اخبارتازہ ترین - این این آئی۔ 16 دسمبر2023ء) لالی ووڈ کی ہیر اداکارہ فردوس بیگم کو مداحوں سے بچھڑے 3 برس بیت گئے، اداکارہ نے 150 سے زائد فلموں میں کام کیا، فلم ہیر رانجھا نے انہیں شہرت کی بلندیوں پر پہنچایا۔

(جاری ہے)

تفصیلات کے مطابق 4اگست 1947 میں پیدا ہونے والی اداکارہ فردوس بیگم کا اصل نام پروین تھا، اپنے فلمی کیرئیر کا آغاز 1963 میں فلم فانوس سے کیا، ادکارہ نے 150 سے زائد فلموں میں اداکاری کے جوہر دکھائے جن میں 20 اردو اور 130 سے زائد پنجابی فلمیں شامل ہیں۔

اداکارہ فردوس بیگم تین پشتو فلموں میں بھی جلوہ گر ہوئیں، اداکارہ کی سپر ہٹ فلموں میں ہیر رانجھا، دلاں دے سودے، ملنگی اور آنسو شامل ہیں، فلم ہیر رانجھا پر بہترین اداکارہ کا نگار ایوارڈ ملا، فلم آنسو اور ضدی میں بہترین اداکارہ کے ایوارڈ کی حق دار ٹھہریں۔اداکارہ کے مکالمے جہاں دلوں میں گھر کر جاتے وہیں ان کی فلموں کے گیت آج بھی کانوں میں رس گھولتے ہیں، فردوس بیگم برین ہیمبریج کے باعث 16 دسمبر 2020 میں لاہور میں انتقال کر گئی تھیں۔