اسلام آباد ہائیکورٹ، توہین عدالت کیس میں عدم حاضری پر ڈپٹی کمشنر اسلام آباد کے وارنٹ گرفتاری جاری

منگل 20 فروری 2024 20:30

اسلام آباد (اُردو پوائنٹ اخبارتازہ ترین - اے پی پی۔ 20 فروری2024ء) اسلام آباد ہائیکورٹ کے جسٹس بابر ستار کی عدالت نے شہریار آفریدی کے خلاف ایم پی او آرڈر جاری کر کے اختیارات سے تجاوز کرنے پر توہین عدالت کیس میں عدم حاضری پر ڈپٹی کمشنر اسلام آباد عرفان نواز میمن کے وارنٹ گرفتاری جاری کر دیئے۔منگل کے روز سماعت کےدوران پراسیکیوٹر قیصر امام،ایس ایس پی آپریشنز ملک جمیل ظفر اور ایس پی فاروق بٹر عدالت کے سامنے پیش ہوئے جبکہ ڈپٹی کمشنر اسلام آباد عرفان نواز میمن عدالت میں پیش نہ ہوئے اور حاضری سے استثنیٰ کی درخواست جمع کرائی۔

ڈی سی اسلام آباد کے وکیل راجہ رضوان عباسی نے کہا کہ ان کے موکل نے عمرہ پر جانا ہے اس لیے وہ خیر پور میں ہیں۔ عدالت نے ڈی سی اسلام آباد کی حاضری سے استثنیٰ کی درخواست مسترد کرتے ہوئے وارنٹ گرفتاری جاری کر دیئے اور چاروں صوبوں کے آئی جیز کو ہدایت کی کہ ڈی سی اسلام آباد کو گرفتار کر کے پیش کریں۔

(جاری ہے)

بعدازاں عدالت نے سماعت کا تحریری حکمنامہ بھی جاری کر دیا۔

جسٹس بابر ستار کی عدالت سے جاری حکمنامہ میں عدالت نے ڈی سی اسلام آباد کو کل صبح 9 بجے گرفتار کر کے پیش کرنے کا حکم دیتے ہوئے کہاکہ آئی جی اسلام آباد دوسرے صوبوں کے ساتھ مل کر وارنٹ گرفتاری پر عمل کروائیں۔ عدالت نے ڈائریکٹر جنرل ایف آئی اے کو بھی حکم دیاکہ ائیرپورٹ ، سی پورٹ یا بارڈر کراسنگ پر ڈی سی اسلام آباد نظر آئیں تو گرفتار کرکے پیش کریں ۔

عدالت نے عدالتی حکم کے باوجود ڈی سی اسلام آباد کی عدم پیشی پر ناقابل ضمانت وارنٹ گرفتاری جاری کر دیئے اور ڈی سی اسلام آباد کا نام ای سی ایل پر ڈالنے کا حکم دیتے ہوئے کہا کہ سیکرٹری داخلہ اور ڈی جی پاسپورٹس ڈی سی اسلام آباد کا نام ای سی ایل پر ڈالنا یقینی بنائیں، ڈی سی اسلام آباد عرفان نواز میمن ملک سے باہر نہ جا سکیں، ڈی سی اسلام آباد کی حاضری سے استثنیٰ کی درخواست منظور نہیں کی، ڈی سی اسلام آباد اس کے باوجود آج عدالت سے غیر حاضر ہوئے ،انصاف کے نظام میں رکاوٹ بننے پر کیوں نہ ڈی سی اسلام آباد کے خلاف کارروائی کی جائے، استثنیٰ کی درخواست منظور نہ ہونے کے باوجود عدالت پیش نہ ہو کر ڈی سی نے بادی النظر میں توہین عدالت کی۔