مصنوعی اور خودساختہ مہنگائی کو کنٹرول کرنے کے لیے تمام پرائس کنٹرول مجسٹریٹس کو زیروٹالرینس پالیسی پر عملدرآمد کرائیں،ڈپٹی کمشنر

رانا ثاقب سلیم پیر 11 مارچ 2024 14:49

بہاولنگر(اردو پوائنٹ اخبارتازہ ترین۔11 مارچ2024 ء) وزیراعلی پنجاب مریم نواز شریف کی ہدایت پر ڈی سی آفس کے کمیٹی روم میں پرائس کنٹرول مجسٹریٹ کااجلاس منعقد ہوا اجلاس میں ڈپٹی کمشنر ذوالفقار احمد بھون نے کہا ہے کہ مصنوعی اور خودساختہ مہنگائی کو کنٹرول کرنے کے لیے تمام پرائس کنٹرول مجسٹریٹس کو زیروٹالرینس پالیسی پر عملدرآمد اور مقررہ نرخوں پر معیاری اشیاء خوردونوش کی فروخت یقینی بنانے کی ہدایات جاری کی گئی ہیں اور پرائس کنٹرول میکانزم کی مانیٹرنگ کررہے ہیں اور ہم نے عوام کو ہر ممکن ریلیف فراہم کرنا ہے۔

یہ بات انہوں نے ڈی سی آفس کے کمیٹی روم میں پرائس کنٹرول مجسٹریٹس کی کارکردگی کے جائزہ اجلاس سے خطاب کرتے ہوئے کہی جس میں اسسٹنٹ کمشنرز اور دیگر متعلقہ محکموں کے افسران نے شرکت کی۔

(جاری ہے)

ڈپٹی کمشنر ذوالفقار احمد بھون نے کہا کہ عوام کو ریلیف کی فراہمی حکومت پنجاب کی اولین ترجیح ہے۔ اسسٹنٹ کمشنرز اشیاء کی قیمتوں، طلب اور رسد کی کڑی نگرانی کریں اور ناجائز منافع خوری،گرانفروشی میں ملوث افراد سے سختی سے نمٹا جائے گا۔

اجلاس میں ڈپٹی کمشنر ذوالفقار احمد بھون نے ہدایت کی کہ اشیاء خوردونوش میں ملاوٹ کرنے والے عناصر کے خلاف سخت کریک ڈاؤن کیا جائے اور ملاوٹ کے مکروہ دھندے میں ملوث افراد کو قرار واقعی سزا دلوائی جائے۔ اجلاس میں تمام پرائس کنٹرول مجسٹریٹس کی انفرادی کارکردگی کا بھی تفصیلی جائزہ لیا گیا۔